მოსახლეობის 59%-მა არ იცის ვის მისცემს ხმას - NDI

როგორც ორგანიზაციაში აცხადებენ, მოსახლეობისთვის საჭირბოროტო საკითხები ძირითადად ეკონომიკას ეხება და ისინი კანდიდატებისგან პრობლემების გადაჭრის გზებზე საუბარს მოელიან.

სასურველი კანდიდატის შერჩევისას მოსახლეობის 36% პირველ რიგში, პარტიის ეკონომიკურ პოლიტიკას, 12% ჯანდაცვის პოლიტიკას და 12% კანონის უზენაესობასთან დაკავშირებულ პოლიტიკას მიიღებს მხედველობაში.

მოსახლეობის ყველაზე მნიშვნელოვან საკითხებში გამოიკვეთა: დასაქმება, სიღარიბე და ფასების ზრდა/ინფლაცია.

ზრდასრული მოსახლეობის მეოთხედი აცხადებს, რომ უმუშევარია, რაც ივნისის კვლევასთან შედარებით შვიდი პროცენტით გაზრდილი მაჩვენებელია. ეს, სავარაუდოდ, კორონავირუსის ეკონომიკური გავლენის შედეგია.

ადგილობრივ დონეზე მოსახლეობის 31% ყველაზე მეტად გზების მდგომარეობაზე, 22% წყალმომარაგებაზე, 13% გარემოს დაბინძურებასა და 13% საცობებზე წუხს.

არჩევნებამდე რამდენიმე კვირით ადრე, მოსახლეობის უმეტესობა (56 პროცენტი) დარწმუნებულია, რომ საპარლამენტო არჩევნები თავისუფალ და სამართლიან გარემოში ჩატარდება.

მოქალაქეების მესამედი აცხადებს, რომ ამომრჩევლების მოსყიდვა არჩევნების სამართლიანად ჩატარებისთვის ყველაზე დიდ გამოწვევას წარმოადგენს. ამას მოსდევს დარღვევები ხმის მიცემის პროცედურებში (15 პროცენტი) და ადმინისტრაციული რესურსების ბოროტად გამოყენება (13 პროცენტი).
NDI-ის კვლევის საველე სამუშაოები 6-11 აგვისტოს ჩატარდა. აღებულია 2,045 დასრულებული ინტერვიუ.

[sknews.ge]