სამცხე–ჯავახეთის რამდენიმე სკოლაში დისტანციური სწავლების ესტონური მოდელი დაინერგება

რამდენი სკოლა ჩაერთვება სამცხე–ჯავახეთიდან ამ ეტაპზე უცნობია. გაეროს ბავშვთა ფონდის კომუნიკაციის პროგრამის ხელმძღვანელის, მაია ქურციკიძის განცხადებით, ახალი მოდელით სწავლის დაწყებამდე, სკოლის ადმინისტრაციის თანამშრომლები და პედაგოგები გადამზადდებიან.

„ისწავლიან ინოვაციურ ტექნოლოგიებზე დაფუძნებული მეთოდების გამოყენებას. ესტონეთი არის წამყვანი ქვეყანა განათლების კუთხით “, - ამბობს მაია ქურციკიძე.

სწავლების ესტონური მოდელი პირველად საქართველოში 2014 წელს გამოიყენეს, მაშინ ქვეყნის მასშტაბით 15 სკოლა შეირჩა, სადაც ინოვაციური სწავლების მეთოდები დაინერგა.

„გაეროს ბავშვთა ფონდის, ესტონეთის მთავრობასა და განათლების სამინისტროს შორის თანამშრომლობა 2014 წლიდან გრძელდება და ეს ითვალისწინებს ესტონური ექსპერტების დახმარებას, როგორც ეროვნული გეგმების გადასინჯვაში, ასევე მასწავლებლებისათვის ციფრულ პლატფორმებით და ონლაინ რესურსებით ხელმძღვანელობის ესტონური გამოცდილების გაზიარებაში. შერჩეული იყო ამ პროექტის ფარგლებში 15 სკოლა საქართველოს მასშტაბით და ამ 15 სკოლის პედაგოგებმა, დირექტორებმა გაიარეს ტრენინგები. ისწავლეს ინოვაციურ ტექნოლოგიებზე დაფუძნებული მეთოდების გამოყენება სწავლების პროცესში, მაგალითად იყო კომბინირებული, ინტერაქტიური გაკვეთილები, როდესაც რამდენიმე საგანს ერთად ასწავლიდნენ, ვთქვათ ბუნება, მათემატიკა და ქართული“, - განმარტავს გაეროს ბავშვთა ფონდის კომუნიკაციის პროგრამის ხელმძღვანელი მაია ქურციკიძე.

პროექტის მეორე ეტაპზე, 100 საჯარო სკოლის ადმინისტრაციის თანამშრომლებს ინოვაციური სწავლების მეთოდების დანერგვაში, 2014 წელს გადამზადებული 15 სკოლის მასწავლებლები დაეხმარებიან.

[რიმა სარუხანიან]