ენზელ მკოიანი საპარლამენტო არჩევნებში კენჭს დამოუკიდებელ კანდიდატად იყრის

ენზელ მკოიანის საინიციატივო ჯგუფმა ცესკოში განაცხადი უკვე შეიტანა.

„ჩემი საინიციატივო ჯგუფი ხუთი ადამიანისგან შედგება, ექიმები, მასწავლებლები და არასამთავრობო ორგანიზაციების თანამშრომლები არიან. ჯგუფის თავმჯდომარე ევგენია კარაპეტიანია. ჩვენ დოკუმენტები 31 აგვისტოს შევიტანეთ, ცესკომ დამატებით დოკუმენტები მოგვითხოვა, დღეს მივიტანთ და ოფიციალურად ვიქნები დარეგისტრირებული“, – ამბობს ენზელ მკოიანი.

მისი თქმით, დამოუკიდებელ კანდიდატად არჩევნებში მონაწილეობა ადგილობრივების მოთხოვნის შემდეგ გადაწყვიტა.

„ხალხი ითხოვდა, რომ არჩევნებში მონაწილეობა უნდა მიმეღო, ხუთჯერ ვიყავი პარლამენტის წევრი და მინდა მეექვსედაც ვემსახურო ადგილობრივებს“, –ამბობს იგი.

ენზელ მკოიანი 1999 წლიდან საქართველოს პარლამენტის დეპუტატია. ორჯერ საინიციატივო ჯგუფმა წარადგინა, ორჯერ საკანონდებლო ორგანოში „ნაციონალური მოძრაობის“ სახელით შევიდა, 2016 წლიდან კი „ქართული ოცნებას“ წარმოადგენს.

2020 წლის ოქტომბრის საპარლამენტო არჩევნებზე მმართველმა გუნდმა მკოიანის ნაცვლად სამველ მანუკიანი დაასახელა.

საარჩევნო კოდექსის 116-ე მუხლის მე-9 ქვეპუნქტის მიხედვით, რადგან მკოიანი მოქმედი დეპუტატია, მას დამოუკიდებელ კანდიდატად წარსადგენად ამომრჩეველთა ხელმოწერები არ ჭირდება.

დამოუკიდებელ კანდიდატების დასარეგისტრირებლად საინიციატივო ჯგუფებს ვადა ხვალამდე, ოთხ სექტემბრამდე აქვთ.

ენზელ მკოიანის სახელი ჯავახეთში არაერთი ხმაურიან საქმეს უკავშირდება, ადამიანის უფლებების სწავლებისა და მონიტორინგის ცენტრი (EMC) "ქართული ოცნების" დეპუტატის "კორუფციულ და კლანურ მმართველობაზე" საუბრობს და მოუწოდებს შინაგან საქმეთა სამინისტროს ჯავახეთში ბოლო პერიოდში მომხდარი ინციდენტები ობიექტურად გამოიძიოს.

თავად მკოიანი კი აცხადებს, რომ უცნობი პირები სიცოცხლის მოსპობით ემუქრებიან და პოლიტიკიდან წასვლას სთხოვენ, დეპუტატი 21 აგვისტოს მისი ძმის, მარტუნ მკოიანის მანქანის აფეთქების მცდელობას მის პოლიტიკურ საქმიანობას უკავშირებს. შესაძლო მუქრისა და აფეთქების საქმეზე შინაგან საქმეთა სამინისტროს გამოძიება აქვს დაწყებული.

ასევე გირჩევთ:




[რიმა სარუხანიან]