მუგარეთთან დაშავებული ახალგაზრდა კაცის მდგომარეობა კრიტიკულად მძიმეა

თბილისის ტრავმატოლოგიურ ჰოსპიტალში აცხადებენ, რომ ახალგაზრდა კაცის მდგომარეობა კრიტიკულად მძიმეა, რის გამოც, ჯერ ოპერაციას ვერ უკეთებენ.

„რეანიმაციულ განყოფილებაში მართვით სუნთქვაზე იმყოფება. შემოყვანიდან არის კრიტიკულად მძიმე მდგომარეობაში. პაციენტს აღენიშნება თავის ტვინის მრავლობითი დაზიანებები, ასევე სხეულის მრავლობითი მოტეხილობა. ველოდებით დინამიკაში მდგომარეობის დასტაბილურებას, რათა მოხდეს ოპერაციის ჩატარება“,– განგვიცხადეს თბილისის ტრავმატოლოგიურ ჰოსპიტალში.

რაც შეეხება დანარჩენ ოთხ პაციენტს მათ, ახალციხის რეფერალური ჰოსპიტალი გუშინ გვიან საღამოს დატოვეს.

„გუშინ შემოყვანილი ხუთი პაციენტიდან ოთხი ჩვენთან იმყოფებოდა, ოთხივე მათგანის მდგომარეობა დამაკმაყოფილებელია. ხელი მოაწერეს წასვლასთან დაკავშირებით და თავიანთი სურვილით დატოვეს კლინიკა“, –ამბობს ახალციხის რეფერალური ჰოსპიტალის ხელმძღვანელი რეზო კუჭუხიძე.

შეგახსენებთ, რომ ავტოსაგზაო შემთხვევა ახალციხეში, ორ სექტემბერს მუგარეთთან მოხდა.

[ნუკა სტეფნაძე]