მუგარეთში ავარიის შედეგად 5 მგზავრი დაშავდა, მათ შორის 2 არასრულწლოვანია

დღეს, ორ სექტემბერს მომხდარი ავარიის შედეგად დაშავებულები, სასწარაფო სამედიცინო დახმარების ჯგუფმა, ახალციხის რეფერალურ ჰოსპიტალში შეიყვანა. ექიმების განმარტებით, ხუთი პაციენტიდან ერთის მდგომარეობა მძიმეა, იგი მართვით სუნთქვაზე იმყოფება.

„ჩვენთან შემოიყვანეს ხუთი მოქალაქე. ერთი ახალგაზრდა კაცია, რომლის მდგომარეობაც მძიმეა. იგი თბილისში გადაიყვანეს, პაციენტს აღენიშნებოდა თავის და გულ–მკერდის დახურული ტრამვა, ფეხის მოტეხილობა, სუნთქვის უკმარისობა“,– ამბობს ახალციხის რეფერალური ჰოსპიტალის ხელმძღვანელი რეზო კუჭუხიძე.

დაშავებულებს შორის არიან არასრულწლოვნებიც: „ამ ეტაპზე მიმდინარეობს კვლევები არიან არასრულწლოვნებიც, სერიოზული არაფერი ჭირთ“,– განაცხადეს კლინიკაში.

შსს-ს ინფორმაციით, საქმეზე მიმდინარეობს გამოძიება სსკ-ის 276-ე მუხლის მეორე ნაწილით, რაც ტრანსპორტის მოძრაობის წესების დარღვევას გულისხმობს, რამაც ჯანმრთელობის დაზიანება გამოიწვია.

ავტოსაგზაო შემთხვევა დაახლოებით 16:30 საათზე მოხდა, როგორც თვითმხილველები ამბობენ, „მაზდის“ მარკის ავტომანქანა საპირისპიროდ მოძრავ „მერსედესს“ შეეჯახა.

„მაზდა ტრაილერს უსწრებდა, სავარუდოდ ვერ დაინახა წინა მხრიდან მომავლი მანქანა და შეეჯახა“,– ამბობს ერთ–ერთი თვითმხილველი.

[ნუკა სტეფნაძე]