ახალციხეში იარაღის უკანონო შეძენა-შენახვა-ტარების ბრალდებით დაკავებულ პირს პატიმრობა შეეფარდა

სხდომაზე პროკურორმა განმარტა, რომ ვინაიდან გამოძიება ჯერ დასრულებული არაა, არსებობს საფრთხე, რომ ა.გ–მ, გათავისუფლების შემთხვევაში საგამოძიო მოქმედებს შეუშალოს ხელი. გარდა ამისა, ბრალმდებელის მტკიცებით, ა.გ წარსულში მრავალჯერაა ნასამართლევი და არსებობს იმის რისკიც, რომ მან სხვა დანაშაულიც ჩაიდინოს.

ადვოკატის განმარტებით, ბრალდებულის დედას ჯანმრთელობასთან დაკავშირებული პრობლემები აქვს, მისი თქმით სწორედ ამ მიზეზით ჩამოვიდა ა.გ საქართველოში რომ დედისთვის მოევლო. ხოლო რაც შეეხება გამოძიებისთვის ხელის შეშლას, ადვოკატი ამბობს რომ ყველა მოწმე პოლიციის თანამშრომელია, ამიტომ ა.გ–ს მხრიდან გამოძიებისთვის ხელის შეშლა გამორიცხულია.

პროცესზე ადვოკატმა ა.გ–ს დაკავების მომენტზეც გაამახვილა ყურადღება. მისი მტკიცებით ბრალდებულს დაკავებისას იარაღი არ ჰქონია, თუმცა პროკურის კითხვაზე, თუ საიდან გაჩნდა მაშინ იარაღი, ადვოკატი პასუხობს, რომ ამაზე თავად ბრალდებული ისაუბრებს მოგვიანებით, რადგან ახლა დუმილის უფლებას იყენებს.

ბრალდებულის ადვოკატმა სხდომაზე მის მიმართ აღკვეთი ღონისძიების სახით 20 000 ლარიანი გირაოს შეფარდება მოითხოვა, თუმცა მოსამართლე ლუიზა თოდუამ მხოლოდ ბრალდების მხარის შუამდგომლობა გაითვალისწინა და ა.გ–ს აღკვეთი ღონისძიების სახით პატიმრობა შეეფარდა.

სამართალდამცველებმა ა.გ ახალციხეში, კოსტავას ქუჩაზე 22 აგვისტოს გვიან ღამით დააკავეს.

დაკავების დროს ბრალდებულთან ერთად იმყოფებოდა მისი ადვოკატი, მარტიროს ოგანესიანიც.

შინაგან საქმეთა სამინისტროში განაცხადეს, რომ გამოძიება 236-ე მუხლის მე-3 და მე-4 ნაწილებით დაიწყო, რაც ცეცხლსასროლი იარაღის და საბრძოლო მასალის მართლსაწინააღმდეგო შეძენა–შენახვა– ტარებას გულისხმობს.

საქმის არსებითი განხილვა 29 ოქტომბერს ჩაინიშნა.

[რობი ზარიძე]