ენზელ მკოიანი აცხადებს, რომ მისი ძმის მანქანის აფეთქება სცადეს

ინფორმაციას ენზელ მკოიანი ფეისბუკის გვერდზე ავრცელებს. ადგილზე მობილიზებულია სამართალდამცველები. შსს–ში ჯერ კომენტარს არ აკეთებენ.

ვიდეოში ენზელ მკოიანი ტელეფონზე საუბრობს და არ გამორიცხავს, რომ დღევანდელი შემთხვევა იმ პირებთან იყოს კავშირში, რომლებიც მას ემუქრებიან. ძმის მანქანის აფეთქება კი იმიტომ სცადეს, რომ ბოლო პერიოდში თვითონ სარგებლობდა.

„უნივერსიტეტის გზაზე, ასაფეთქებელი მოწყობილობა, რომელიც დისტანციურად იმართებოდა, მანქანის მიახლოებისას აფეთქდა. აფეთქება ისეთი ძლიერი იყო, რომ ადგილზე დიდი ორმო გაჩნდა, ხის ტოტოები და მიწა კი მანქანას შეეყარა. ძლიერი ბიძგის შედეგად მანქანაში საავარიო ბალიშები გაიშალა", – ჰყვება მკოიანი ფეისბუკის პირდაპირ ეთერში.

ვიდეოში ასევე ისმის საყვედური გენერალური პროკურორის ირაკლი შოთაძის მისამართითაც.

„მივწერე შოთაძეს [გულისხმობს მის მიმართ განხორციელებული მუქარისა და გამოძალვის შესაძლო ფაქტებს]. ასე არ შეიძლება გაკეთება, 21 წელია პარლამენტის დეპუტატი ვარ, მან კი ჩემი საქმე რეგიონულ სამმართველოში გამოაგზავნა განსახილველად".

ენზელ მკოიანი აცხადებს, რომ 20 და 24 მაისს "მესენჯერით" და „ვოცაფით“ უცნობი პირები დაუკავშირდნენ 5 მლნ დოლარი მოსთხოვეს და უთხრეს, რომ პოლიტიკას ჩამოშორებოდა, წინააღმდეგ შემთხვევაში "მას წაართმევდნენ მისთვის ყველაზე ახლობელ ადამიანს, სართხე შეექმნებოდა მის სიცოცხლესაც".

ენზელ მკოიანის მისამართით მუქარასა და თანხის გამოძალვასთან დაკავშირებით "ოცნების" დეპუტატის ადვოკატმა, ტარიელ მურმანიშვილმა ბრიფინგი 10 აგვისტოს გამართა. აღნიშნულ საქმეზე შინაგან საქმეთა სამინისტრომ გამოძიება დაიწყო.