‘თუ ახალგაზრდებს დააკავებენ თავს დავიწვავ’ – გარდაცვლილი 27 წლის ბიჭის მამა

აქციის შესახებ ინფორმაციას jnews.ge ავრცელებს, მათი თქმით, ახალქალაქში რვა აგვისტოს მომხდარ მკვლელობასთან, ასევე სახლების და მანქანების დაწვასთან დაკავშირებით, პოლიციაში 40–მდე გულიკამელი ახალგაზრდა დაიბარეს.

დაკითხვასთან დაკავშირებით ადგილობრივები სამართალდამცავებმა დღეს, 16 აგვისტოს გააფრთხილეს.

„ჩემი მოთხოვნაა, რომ ბიჭები არ წაიყვანონ. ჩემი ვაჟი გარდაიცვალა, თუ ამ საქმეში კიდევ სხვა მსხვერპლი გვეყოლება ჩემს ცხოვრებას აზრი აღარ ექნება. მე ჩავთვლი, რომ არაფერი მომხდარა, ვიფიქრებ, რომ ჩემი შვილი შევწირე. ჩვენ არ ვაპირებთ შურისძიებას ან მტრობას. შევიკრიბეთ იმისთვის, რომ ჩემი შვილის მკვლელობის საქმეზე, ჩვენი სოფლის არც ერთი ახალგაზრდა არ იყოს დაკითხული. მე ვუთხარი პოლიციას, თუ ახალგაზრდებიდან ვინმეს წაიყვანენ ახალციხეში და დააპატიმრებენ, მაშინ მე ქალაქის ცენტრში თავს დავწვავ “, - განაცხადა გარდაცვლილი 27 წლის ბიჭის მამამ, არსენ მირანიანმა.

სოფელ გულიკამში მცხოვრები ვარდიკ მირანიანი, ახალქალაქის ცენტრში, ცეცხლსასროლი იარაღით რვა აგვისტოს მოკლეს. იმავე დღეს, სავარაუდოდ გარდაცვლილის მეგობრებმა მკვლელობაში ბრალდებულის და მისი ახლობლების სასტუმრო, ოთხი სახლი, ერთი სავაჭრო ობიექტი და ორი მანქანა დაწვეს.

მომხდართან დაკავშირებით, შინაგან საქმეთა სამინისტროს მხოლოდ ერთი პირი, მკვლელობაში ბრალდებული ჰყავთ დაკავებული.

გამოძიება საქართველოს სისხლის სამართლის კოდექსის 108-ე მუხლით და 236 მუხლის III და IV მუხლებით მიმდინარეობს, რაც განზრახ მკვლელობას და იარაღის მართლსაწინააღმდეგო შეძენა შენახვას გულისხმობს.

უწყების ინფორმაციით, ჯგუფური ძალადობის ორგანიზებასა და მასში მონაწილეობის ფაქტზე გრძელდება გამოძიება დანაშაულის ჩამდენი პირების დადგენა დაკავების მიზნით.

ასევე ნახეთ:





[რიმა სარუხანიან]