ავტომობილების განბაჟება 2021 წლის მარტამდე გადავადდება – გახარია

ამის შესახებ მთავრობის მეთაურმა, დღეს, 13 აგვისტოს მთავრობის სხდომის დაწყებისას განაცხადა. მისი თქმით, შეღავათით დაახლოებით 24 ათასი ავტომფლობელი ისარგებლებს.

„ფაქტია, კრიზისის ზემოქმედება გრძელვადიანი იქნება. რამდენჯერმე მოგვმართეს უკვე ავტოიმპორტიორებმა. განბაჟებასთან დაკავშირებით, ერთხელ უკვე გადავავადეთ, ფისკალური წლის ინტერესებიდან გამომდინარე, ალბათ უმჯობესი იქნება გადავავადოთ 2021 წლის მარტამდე, რაც ნიშნავს, რომ როგორც განბაჟება გადავადდება, ასევე არ მოხდება საურავების დარიცხვა. ეს დაახლოებით 24 000 ავტომფლობელს შეეხება და თუ არ ვცდები, ესაა 30 მილიონ ლარზე მეტი შეღავათი საგადასახადო გადავადების“,- განაცხადა გახარიამ.

ავტომობილების განბაჟების ვადა პანდემიის პერიოდში მთავრობამ მეორედ გაახანგრძლივა. თავდაპირველად, პირველ მაისამდე შემოყვანილი ავტომობილების დეკლარაციის ვადა პირველ სექტემბრამდე გახანგრძლივდა.

[sknews.ge]