ახალქალაქში, მდინარე ფარავანსა და კორხიწყალზე ჰესების მშენებლობის შესახებ ცნობილი 2019 წელს გახდა. თავდაპირველად, ადგილობრივები ჰესების მშენებლობის
წინააღმდეგი იყვნენ. სოფელ კორხის მოსახლეობა 2020 წლის, თებერვალში „სამხრეთის კარიბჭესთან“ ამბობდა, რომ მდინარეზე ჰესის მშენებლობას არ დაუშვებდა, რადგან ეს სოფლის მოსახლეობას პრობლემებს შეუქმნიდა.
გარდა სოფელ კორხისა, ჰესების, „ახალქალაქი 1“ და „ახალქალაქი 2“ მშენებლობის ზონაში კიდევ 2 სოფელი, დილისკა და ორჯა ექცევა, თუმცა თებერვალში ისინი ჰესების მშენებლობას გარკვეული პირობების სანაცვლოდ დათანხმდნენ.
ირკვევა, ჰესების მშენებლობას აღარ აპროტესტებენ არც სოფელ კორხში მცხოვრებელები. როგორც მშენებლ კომპანია შპს „აისში“ განმარტავენ, სამივე სოფელში, რომლებიც პროექტის ზემოქმედების ქვეშაა მოქცეული, ისინი სოციალურ პროექტებს განახორციელებს.
კომპანიაში ირწმუნებიან, რომ ჰესების მშენებლობის წინააღმდეგი არცერთი სოფლის მოსახლეები არ ყოფილან: „მოსახლეობა საჯარო განხილვების არც ერთ ეტაპზე წინააღმდეგი არ ყოფილა „ახალქალაქი 1“ და „ახალქალაქი 2“ ჰესების მშნებლობისა“.
მათივე თქმით, პროცესი გაჭიანურდა მხოლოდ სოფელ კორხში, თუმცა არა იმის გამო, რომ ადგილობრივები ჰესების მშენებელობა გააპროტესტეს, არამედ იმიტომ, მათ დასახლებებში განსახორციელებელი სოციალური პროექტები დროულად ვერ შეარჩიეს.
„აღსანიშნავია რომ, თავდაპირველად სოფლის მოსახლეობამ ითხოვა სოფლის სარწყავი სატუმბი სადგურის რეკონსტრუქცია. აღნიშნულთან დაკავშირებით, კომპანიამ დაუკვეთა საპროექტო კომპანიას და მოამზადა შესაბამისი პროექტი. თუმცა მოგვიანებით, სოფელმა უფრო პრიორიტეტულად ჩათვალა სპორტული დარბაზის მშენებლობა. ამისათვის, კომპანიამ სოფელ კორხის მოსახლეობას გადაწყვეტილების მისაღებად დამატებითი 1 თვის ვადა მისცა. სოფელ კორხის მოსახლეობა საბოლოოდ შეჯერდა სპორტული დარბაზის მშენებლობაზე“ – გვითხრეს კომპანიაში.
ჰესების მშენებლობასთან ერთად, სამ სოფელში სოციალური პროექტების განხორციელების შესახებ მუნიციპალიტეტსა და კომპანიას შორის მემორანდუმიც გაფორმდა, რომლის მიხედვითაც შპს „აისმა“ ჰესებთან ერთად ახალქალაქის სამ სოფელში 10 პროექტი უნდა განახორციელოს.
კომპანიის მოწოდებული ინფორმაციით, ეს პროექტებია:
სოფელ დილლისკაში: • არსებული სასმელი წყლის მილსადენის რეაბილიტაცია ფოლადის მილების ჩანაცვლება პლასტმასის მილით;
• მდ. ფარავანზე, სათავე ნაგებობის მიმდებარედ არსებული ძველი სასაფლაოს ტერიტორის კონკრეტული მონაკვეთის (დაახლოებით 0.25ჰა) მიწის მოსწორება და მოხრეშვა;
• ახალ სასაფლაოსთან მისასვლელი გზის (200 მ) ასფალტირება;
• ჰესის შენობის მიმდებარედ არსებული სალოცავის გადატანა.
სოფელ ორჯაში: • სოფლის სარწყავი სატუმბი სადგურის რეკონსტრუქცია, -ორი ახალი ტუმბოს დამონტაჟება,დადგმული სიმძლავრით 450 kW;
• მსხვილფეხა პირუტყვისათვის წყლის დასალევად ადგილის მოწყობა;
• მდინარეზე თვითდინებით შევსებადი საცურაო აუზის მოწყობა.
სოფელ კორხში: • მსხვილფეხა პირუტყვისათვის წყლის დასალევად ადგილის მოწყობა;
• მდინარეზე თვითდინებით შევსებადი საცურაო აუზის მოწყობა;
• სპორტული დარბაზის მშენებლობა. აღნიშნული ითვალისწინებს დახურული ტიპის სპორტული დარბაზის მშენებლობას შესბამისი გასახდელით, საშხაპეებით, კალათბურთის და ფრენბურთის მოედნის მოწყობას.
ჰესების მშენებლობის შესახებ ნებართვა „აისს“ სახელმწიფოსგან უკვე აქვს. როგორც კომპანიაში განმარტავენ, ახალქალაქის მიმდებარედ, მდინარე ფარავანსა და კორხისწყალზე ორი ჰესის აშენებას 2020 წლის შემოდგომით დაიწყებენ. ამავე პერიდში დაიწყება სოფლებში სოციალური პროექტების განხორციელებაც.
„ჰესების ექსპლუატაციაში გაშვების შემდგომ, კომპანია ახალქალაქის მუნიციპალიტეტის ბიუჯეტში ქონების და მოგების გადასახადის სახით გადაიხდის დაახლოებით 500,000 ლარს წლიურად“, – აცხადებენ კომპანიაში.
ჰესების ჯამური დაგეგმილი სიმძლავრე 8,5 მეგავატი იქნება, კომპანიის ინფორმაციით, „მშენებლობა არ ითვალისწინებს რეზერვუარის მოწყობას, შესაბამისად არ იგეგმება არც სოფლებისა და არც სახნავ-სათესი სავარგულების დატბორვა“.
[რობი ზარიძე]