სასულიერო პირების ნაწილმა სოფელი ჭელა დატოვა

მამა დავით ნოზაძე

„ლოცვას ჩვენ არავის ვუშლით, მაგრამ მინარეთი არის იმისთვის, რომ მოძახილი გააკეთონ. მე ტაძარში ზარს რატომ ვრეკავ? იმისთვის, რომ ხალხს მოვუწოდო ლოცვისკენ, მინარეთის დანიშნულებაც ეს არის. ევროკავშირი თურქეთს სთხოვს, რომ თუ ევროკავშირში ყოფნა სურთ, დღეში 5-ჯერ არ გააკეთონ მოძახილი. თავისუფალი არჩევანის უფლებას კი არავინ არავის უკარგავს",- ამბობს მამა დავით ნოზაძე.

ჭელის მეჩეთის წინამძღვარი ჯამბულ აბულაძე ამბობს, რომ დღევანდელი საპროტესტო აქცია დაპირისპირებას არ გამოიწვევს.

"ჩვენ მოვუწოდებთ ჩვენს მრევლს, რომ დღეს თავი შეიკავონ მეჩეთში სალოცავად მოსვლისგან. აქ ამოსულები არიან მართმადიდებელი მღვდლები, ჩვენ მათ პატივს ვცემთ და არ გვინდა, რომ დაძაბულობა გამოიწვიოს რაიმე ფაქტმა. რამდენხანსაც სურთ ილოცონ, ჩვენ ეს ადამიანები ხელს არ გვიშლიან“, - ამბობს იგი.

მართმადიდებელი მღვდლების ნაწილმა უკვე დატოვა სოფელი. ამდრომდე ადგილზე რჩებიან სამართალდამცველები. ჭელაში დილიდან იმყოფება შსს სამცხე-ჯავახეთის სამხარეო სამმართველოს ადიგენის რაიონული სამმართველოს უფროსი გელა კოხოძეც.

შეგახსენებთ, მინარეთის დაბრუნების გამო ჭელაში 28 ნოემბერს დილიდან შეიკრიბნენ სასულიერო პირები და მეჩეთის ეზოში საპროტესტო პარაკლისი გადაიხადეს.

[sknews.ge]