ზარზმის მონასტრის წინამძღვარი: მინარეთის დაბრუნებით სახელმწიფომ საკუთარი თავი ჩიხში შეიყვანა

მამა ნიკოლოზ გეწაძე ამბობს, რომ ადიგენის სოფლებში ქრისტიანები გაცილებით მეტად იჩაგრებიან, ვიდრე მუსლიმები. ისინი დაშინებული არიან და ამას ის ფაქტიც მოწმობს, რომ დღეს, 28 ნოემბერს, მინარეთის აღმართვიდან მეორე დღეს, ადგილობრივი ქრისტიანები მეჩეთთან არ ჩანან.

"როცა აქ მინარეთის დემონტაჟი მოხდა და აჭარლები დააკავეს, მათ წინააღმდეგ საქმე აღიძრა, მაგრამ მინიმალური ჯარიმებით გაათავისუფლეს და არცერთი სათანადოდ არ დაისაჯა. ერთი რაჭველი მითხარით მინიმალურ დანაშაულზე, რომელმაც პასუხი სათანადოდ არ აგო", - ამბობს იგი და ამატებს, რომ ამ ადამიანებს მთავრობა უფრთხილდება,- "გადახედეთ რაჭველებისა და აჭარლების ცხოვრებას და მიხვდებით რა არის მათში სხვაობა. აჭარელს მთელი ტყე რომ გამოეტანა და რაჭველს ერთი ფიჩხი, პასუხი მხოლოდ რაჭველს მოეთხოვებოდა".

ზარზმის წინამძღვრის თქმით, ქრისტიანები ჭელაში მართლმადიდებლურ ტაძარს აშენებენ და მასალის შეგროვება გაუჭირდათ: "სახურავის გადასახურად ათი მორი გვჭირდებოდა. ადგილობრივი სატყეო სამმართველოს უფროსი აჭარელია, შესაბამისად, მან თავიდან აირიდა. საბოლოოდ, ათი მორი ვითხოვეთ და გადახურვის შემდეგ უკან უნდა დავაბრუნოთ. ეს სამარცხვინოა მაშინ, როცა ადიგენის რაიონიდან მთელი მასალაა გაზიდული. როცა ადამიანის უფლებებზე მიდის ლაპარაკი და ვამბობთ, რომ პატივს ვცემთ მათ უფლებებს, მინდა მოკრძალებული კითხვა დავსვა: სად არის დემოკრატია".

მისივე თქმით, როცა ჭელაში მინარეთი დაიდგა, მეუფის კეთილი ნება იყო, რომ ამას მკვეთრი რეაქცია არ მოჰყვა.

"სახელმწიფომ საკუთარი თავი ჩიხში შეიყვანა. რადგან საკრებულომ დაადგინა და ამის აღმათვა სამართლებრივად მოხდა, ხელში რაღაცეების აღებას, მათ დევნას და მოწოდებების გაკეთებას არ ვაპირებთ. პროტესტი დღევანდელი დღით არ დასრულდება, მაგრამ ეს არ არის მხოლოდ ჩემი პროტესტი. მე ვიცი, რომ სახელმწიფოს მაღალჩინოსნები თავადაც წუხან ამის გამო, მე ვუთანაგრძნობ, რომ მსგავსი გადაწყვეტილების მიღება მოუწიათ", - ამბობს იგი.

შეგახსენებთ, მინარეთის დაბრუნების გამო, 28 ნოემბერს დილიდან ჭელაში სასულიერო პირები შეიკრიბნენ და საპროტესტო პარაკლისი გადაიხადეს.

[sknews.ge]