ბორჯომში ავარიისას დაშავებულმა მგზავრმა თავის მძიმე ტრავმა მიიღო

ბორჯომის საავადმყოფოს მენეჯერის, ირაკლი დიასამის განმარტებით, დაშავებულებიდან ერთი პაციენტის მდგომარეობა მძიმეა. მას თავის ტრავმა აქვს მიღებული და შესაძლოა თბილისში გადაყვანა დასჭირდეს.

„ ამ წუთებში უტარდება კატე, კვლევა. ველოდებით პასუხს. ამის შედეგად გავიგებთ თბილისში გადაყვანა გახდება თუ არა საჭირო. ამ ეტაპზე, პირველადი სასწრაფო რომ იყოს ტრავმატოლოგიური ოპერაციები ჯერ ასეთი მდგომარეობა არ არის, შესაძლოა შემდეგ დასჭირდეთ“.
შეჯახების შემდეგ, ბორჯომის საავადმყოფოში სულ 12 დაშავებული შეიყვანეს, მათ შორის ავტომანქანების მძღოლები.

ხუთმა პაციენტმა საავადმყოფო უკვე დატოვა: „ჩვენთან, ამჟამდად, შვიდი პაციენტია დარჩენილი. მოტეხილობები და დაჟეჟილობები აქვთ. აღენიშნებათ საშუალო სიმძმის ტრავმები“, - ამბობს საავადმყოფოს მენეჯერი.

დღესვე დაშავებული მგზავრები შეიყვანეს ახალციხის რეფერალურ ჰოსპიტალშიც: „ჩვენთან ორნი არიან, ბიჭი და გოგო. თავს კარგად გრძნობენ, ნევროპათოლოგმა უნდა გასინჯოს“, - აცხადებენ საავადმყოფოში.

ორი მიკროავტობუსი ერთმანეთს დღეს, 1-ელ აგვისტოს შეეჯახა.

[ნუკა სტეფნაძე]