‘სამჯერ ამოვტრიალდით’ - ასპინძა-ახალქალაქის გზაზე ავარიისას დაშავებული

ფოტო: jnews.ge

ანიუტ მალხასიანი დღეს, სამ თებერვალს, ახალქალაქი-ბათუმის მიკროავტობუსით, სამი წლის შვილთან ერთად ბათუმში მიდიოდა. მისი თქმით, ავტობუსში შვიდი მგზავრი იმყოფებოდა.

დაშავებული იხსენებს, რომ სოფელ რუსთავთან ავტომანქანის და მიკროავტობუსის შეჯახების შემდეგ, სამგზავრო მიკროავტობუსი გზის სავალი ნაწილიდან გადავიდა და რამდენჯერმე ამოტრიალდა.

„არაფერი მახსოვს გარდა იმისა რომ რამდენჯერმე ამოვბრუნდით, მარშუტკაში სულ შვიდი მგზავრი ვიყავით. მე ხელზე რამდენიმე ნაკერი დამადეს, ჩემი შვილი კარგადაა, უბრალოდ თავი სტკივა“, - ამბობს მალხასიანი.

მათი თქმით, კლინიკას დღესვე დატოვებენ.

რაც შეეხება მეორე დაშავებულს, შუახნის ქალი ახალციხის რეფერალურ საავადმყოფოში რჩება. კლინიკის დირექტორის, რევაზ კუჭუხიძის თქმით, შესაძლოა დაშავებულის თბილისში გადაყვანა გახდეს საჭირო.

„სახის ტრავმა აქვს, სავარაუდოდ შუბლის და ცხვირის ძვლის მოტეხილობა აქვს. ვნახოთ თუ ყბა–სახის ქირურქი დასჭირდა, შესაძლოა თბილისში ტრანსპორტირება დასჭირდეს. ახლა დაკვირვების პროცესში ვართ“, - ამბობს კუჭუხიძე.

დღეს, სამ თებერვალს ასპინძა-ახალქალაქის გზაზე სამგზავრო მიკროავტობუსი და მსუბუქი მანქანა ერთმანეთს შეეჯახნენ. შემთხვევის შედეგად სამედიცინო დაწესებულებაში ორი დაშავებული გადაიყვანეს. სხვადასხვა სახის მსუბუქი დაზიანერება მიიღეს დანარჩენმა მგზავრებმაც, თუმცა მათი გადაყვანა სამედიცინო დაწესებულებაში არ გახდა საჭირო.

[მარიამ ბარძიმაძე, ასპინძა]