ბორჯომში ავარიისას დაშავებული ქალი თბილისის საავადმყოფოში მართვით სუნთქვაზეა

ავარიისას დაშავებული ქალი ბორჯომის საავადმყოფოდან კატასტროფის მანქანით გუშინ, 1–ელ აგვისტოს, საღამოს 19:30 საათზე გადაიყვანეს. იგი ამჟამად თბილისის ცენტრალურ საავადმყოფოში მკურნალობს. ექიმების თქმით, მდგომარეობა მძიმეა: „პაციენტი შემოვიდა პოლიტრამვით.
აღენიშნებოდა ქალა ტვინის დახურული ტრამვა და დიფუზურ აქსონალური დაზიანება, თავის ტვინის შეშუპება, მარცხენა ბარძაყის ძვლის მოტეხილობა, მარჯვენა მხრის ძვლის მოტეხილობა და ტრამვული შოკი. მდგომარეობა არის მძიმე“, – აცხადებენ საავადმყოფოში.

ამჟამად, პაციენტი მართვით სუნთქვაზე იმყოფება: „ჩაუტარდა ბარძაყის და მხრის ძვლის მოტეხილობების ფიქსაცია და ორმხრივი დეკომპრესული ტრეპანაცია. პაციენტი მართვით სუნთქვაზეა“.

რაც შეეხებათ სხვა პაციენტებს, დღეს, 2 აგვისტოს ბორჯომის საავადმყოფო მათ ეტაპობრივად დატოვეს. ამ დროისათვის სამედიცინო დაწესებულებაში მხოლოდ ორი პაციენტი რჩება: „ორი პაციენტია კლინიკაში, დანარჩენები გაწერილები არიან. დღესვე გაეწერა არასრულწლოვანიც. ვინც კლინიკაში რჩება, მათი მდგომარეობა სტაბილურია“, – აცხადებენ ბორჯომის საავადმყოფოში.

ბორჯომში ავტოავარია 1–ელ აგვისტოს მოხდა. ლიკანის დასახლებასთან ერთმანეთს ახალციხე–თბილისის სამგზავრო მიკროავტობუსი და სადისტრიბუციო მანქანა შეეჯახნენ. დაშავდნენ მგზავრები და ავტომანქანების მძღოლები.

[თაკო ფეიქრიშვილი]