‘ვიდეო დაჭრილია და არ ასახავს სრულ სურათს ’ – მკოიანი სოციალურ ქსელში გავრცელებულ კადრებზე

"ოცნების" დეპუტატმა „ახალქალაქი ნიუსის“ ვიდეო კადრების საპასუხოდ ახალი ფირი გაავრცელა. ენზელ მკოიანი ირწმუნება, რომ პირველად, პოლიციის ყოფილი უფროსი და "პატრიოტთა ალიანის" წევრი სამველ პეტროსიანი ისვრის.

„უკვე რამდენიმე დღეა ინტერნეტში გავრცელდა ინფორმაცია და ვიდეო ჩანაწერი ჩემს შესახებ, რომელიც დაკავშირებულია 26 მარტს ახალქალაქში მომხდარ მოვლენებთან. ეს იყო ცალმხრივად ნაჩვენები და ამოჭრილია ვიდეოს ძირითადი ნაწილი.მინდა წარმოგიდგენოთ ამ შემთხვევის ვიდეო მასალა მთლიანად, სადაც ჩანს თუ როგორ მიზანმიმართულად 3 – ჯერ განხორციელდა სროლა ჩემსა და ჩემი ნათესავების მიმართულებით. ეს იყო ჩემი მკვლელობის მცდილობა .მხოლოდ ამ ყველაფრის შემდეგ მე თავდაცვის მიზნით ვესროლე. ზოგი ოპოზიციური არხები და ფეიკ გვერდები სპეციალურად ავრცელებენ ამ ვიდეომასალის შემცირებულ მოჭრილ მონაკვეთს. მათი მიზანია ცრუ ინფორმაციის საშუალებით გამოიწვიონ გამოძიების დაბნეულობა“, - წერს საკუთარი ფეისბუქის გვერდზე მკოიანი.



„ახალქალაქი ნიუსმა“ ენზელ მკოიანის მიერ სროლის ამსახველი ვიდეო კადრები ოთხი დღის წინ გაავრცელა.

კოალიცია თანასწორობის წევრი ორგანიზაციები მოუწოდებენ საქართველოს გენერალურ პროკურატურას, ახალქალაქი-ნინოწმინდის მაჟორიტარი დეპუტატის, ენზელ მკოიანის მიერ ჩადენილი სავარაუდო დანაშაულის ფაქტზე დამოუკიდებელი და ეფექტიანი გამოძიება ჩაატარონ და არ დაუშვან ლოიალობა და პრივილეგიები მკოიანისა და მისი გარემოცვის მიმართ.

დაპირისპირება ახალქალაქის ცენტრში 26 მარტს, დაახლოებით 15:00 საათზე, ენზელ მკოიანის საცხოვრებელ სახლთან მოხდა.

აღნიშნულ საქმეზე შსს–მ გამოძიება ჯგუფურად ჩადენილი დანაშაულისა და იარაღის მართლსაწინააღმდეგო შეძენა-შენახვა-ტარების მუხლებით დაიწყო. სამველ პეტროსიანი და არმენ მკოიანი 29 მარტს დააკავეს.

თუმცა შემდეგ ორივე ბრალდებული სასამართლომ 20-20 ათასიანი გირაოთი დარბაზიდან გაათავისუფლა.

[მარიამ ბარძიმაძე]