მესხეთის სახელმწიფო თეატრი სპექტაკლებს ღია ცის ქვეშ გამართავს

ახალციხეში, მესხეთის სახელმწიფო თეატრმა დაახლოებით ოთხთვიანი პაუზის შემდეგ, მუშაობა განაახლა. მაყურებელი ნოდარ დუმბაძის „მზიანი ღამეს“ პრემიერას იხილავს.

„პრემიერისთვის ვემზადებით, რომელსაც თვის ბოლოს წარვუდგენთ მაყურებელს ღია სივრცეში. თეატრის ტერიტორიაზე ჩატარდება, რადგან სხვაგან ვერ წავიღებთ ინვენტარს და დეკორაციებს, ბევრ პრობლემასთან არის დაკავშირებული ამდენი ნივთის ტარება. ამიტომ სცენას თეატრის წინ, ან უკანა მხარეს მოვაწყობთ“, – ამბობს მესხეთის სახელმწიფო თეატრის სამხატვრო ხელმძღვანელი ლია სულუაშვილი.

სამხატვრო ხელმძღვანელის განმარტებით ბილეთების ფასი პრემიერებსა და სპექტაკლებზე არ შეიცვლება, ხოლო მაყურებელთა რაოდენობა შეზღუდული იქნება.

„პრემიერაზე დასწრება ისევ 5 ლარი ეღირება, ფასებს არ ვცვლით, მაგრამ სკამების რაოდენობა შეზღუდული იქნება დისტანციით, თუ რამდენი სკამის დადებას მოვახერხებთ ჯერ არ ვიცით“, – განმარტა სულუაშვილმა.

მისი თქმით, დასმა სრული შემადგენლობით განაახლა მუშაობა და პირველი პრემიერის შემდეგ, დაგეგმილია სხვა სპექტაკლების ჩვენებაც.

„აგვისტოში დავდგამთ „გაქცევას“, ასევე ვგეგმავთ ძველი სპექტაკლების აღდგენას. ოთხი თვე გაჩერებული ვიყავით, ახლა ვცდილობთ ავინაზღაუროთ“, – აღნიშნა ლია სულუაშვილმა.

შეგახსენებთ, რომ ახალციხეში სპექტაკლების ჩვენება პანდემიის გამო 12 მარტს შეწყდა.

[ნუკა სტეფნაძე]