ისტორია სცენაზე

26 აპრილს მესხეთის სახელმწიფო დრამატულ თეატრში 45-ე სეზონი გაიხსნა. ოთხთვიანი პაუზის შემდეგ მესხეთის თეატრმა მაყურებელს “ქეთევანი” წარმოუდგინა

ოთარ ჩხეიძის პიესა სცენაზე მესხეთის სახელმწიფო დრამატული თეატრის დირექტორმა ლია სულუაშვილმა დადგა. სპექტაკლზე 18 მსახიობი იყო დაკავებული და დასი პრემიერისთვის თვენახევარი მუშაობდა.
“მესხეთის თეატრს ძირითადად ახალგაზრდა მაყურებელი ჰყავს. მინდოდა, რომ ჩვენს მაყურებელს კიდევ ერთხელ გადაევლო თვალი საქართველოს ტანჯული ისტორიისთვის. ქვეყნის გადარჩენა მხოლოდ მკერდზე მჯიღის ცემა არაა. ამის შესხენება კი ჩვენაირ პატარა ერს ყოველთვის სჭირდება”, - ამბობს სულუაშვილი.

მთავარი როლის, ქეთევანის შემსრულებელი ლიაკო გოგიძე ფიქრობს, რომ სპექკლტები, რომლებიც სამშობლოს სიყვარულსა და რელიგიურ თემებზეა, ხშირად უნდა იდგმებოდეს: “ჩემი თაობის ახალგაზრდებში სამშობლოს სიყვარული შემორჩენილი არაა, ბევრი ეკლესიასაც მოშორდა. ვფიქრობ მიზანი მიღწეულად ჩაითვლება, თუ ამ წარმოდგენის შემდეგ ახალგაზრდები ამის შესახებ დაფიქრდებიან მაინც”.
თემიდან გამომდინარე მეტად საპასუხისმგებლო და საინტერესო იყო მუშაობა სცენოგრაფისთვისაც.
“რელიგიური თემები არც თუ ისე ხშირად იდგმება. რთული არა მაგრამ სააზროვნო პისა იყო”, - გვითრა სცენოგრაფმა ლელა ფერაძემ.
“ქეთევანის” დასადგმელად ადგილობრივი ბიუჯეტიდან 12 ათასი ლარი დაიხარჯა. სულუაშვილის განმარტებით ეს თანხა, კომუნალური ხარჯებისა და მსახიობთა ჰონორარებისთვის გაიწერა.

სეზონის მეორე პრემიერას მესხეთის თეატრის მაყურებელი ივნისში ნახავს. თამარ ფხაკაძის პიესას “ბოსტანი კონფლიქტის ზონაში” რეჟისორი ვანო ხუციშვილი დადგამს. მიმდინარე წელს მესხეთის თეატრში გეგმით გათვალისწინებული ექვსი წარმოდგენა დაიდგმება.

[თამუნა უჩიძე, ახალციხე]