სოფელ კარტიკამში მესამე დღეა 54 წლის კაცს ეძებენ

სოფელ კარტიკამში მერის წარმომადგენელი შალიკო ელიზბარიანი ამბობს, რომ 54 წლის კაცი სახლიდან დაახლოებით 19:00–დან 20:00 საათამდე პერიოდში გავიდა. იგი ბოლოს ვიდეო კამერებმა ფარავნის ჰესთან დააფიქსირეს.

„სოფლის მოსახლეობა და პოლიცია ეძებს, მაგრამ ვერსად ნახეს“, – გვითხრა შალიკო ელიზბარიანმა.

დაკარგულის ძმისშვილი ამბობს, რომ გრიშა ერანოსიანმა სახლიდან გასვლისას დაიბარა, რომ სასეირნოდ გადიოდა.

„სახლიდან რომ გავიდა ძალიან ნორმალურ მდგომარეობაში იყო, თქვა სოფელში გავისეირნებ და მოვალო. ადგილობრივებისთვის უთქვამს, რომ სოფლის ხიდთან მივდივარო, მაგრამ ამ ხიდს გადაცილებულა და წასულა სოფელ კულიკამში. კულიკამის შემდგომ ახალქალაქის შესასვლელთან ბენზინ გასამართი სადგომის კამერებში ფიქსირდება, შემდგომ წასულა ახალციხის მიმართულებით, ფიქსირდება ფარავნის ჰესის კამერებში, ამის მერე კვალი ქრება. ასპინძის მიმართულებით არსებულ კამერებიდან არც ერთში არ ფიქსირდება“, – გვითხრა დაკარგული კაცის ძმისშვილმა შაჰენ ერანოსიანმა.

შინაგან საქმეთა სამინისტროში განმარტეს, რომ გამოძიება სსკ–ის 143–ე მუხლის პირველი ნაწილით მიმდინარეობს, რაც თავისუფლების უკანონო აღკვეთას გულისხმობს. ისჯება თავისუფლების აღკვეთით ვადით ორიდან ოთხ წლამდე, იარაღთან დაკავშირებული უფლებების შეზღუდვით ან უამისოდ.

[რიმა სარუხანიან]