კაცს, რომელმაც სოფელ კლდეში დამწვრობა მიიღო, ოპერაციას გაუკეთებენ

„პაციენტი სტაბილურადაა, რჩება რეანიმაციულ განყოფილებაში, ამ კვირაში კანის გადანერგვის ოპერაციას გავუკეთებთ“, - ამბობს დამწვრობის ცენტრის ხელმძღვანელი გუგა ქაშიბაძე.

39 წლის კაცს სხეულის 35 პროცენტი აქვს დამწვარი. „დამწვარი აქვს სახე, თავი მთლიანად, გულ–მკერდის წინ ზედაპირი, მუცლის წინა ზედაპირი, ორივე ზემოკიდური და მტევნები“.

შემთხვევა 26 ივნისს საღამოს მოხდა. აღნიშნულ ფაქტთან დაკავშირებით რამდენიმე ვერსია ვრცელდება. ერთი ვერსიით, 39 წლის კაცი მეგობრებთან ერთად ღია ცის ქვეშ, კოცონთან ქეიფობდა. როცა ცეცხლი მინელდა კაცმა გადაწყვიტა, რომ იგი ხელახლა დაენთო, რისთვისაც ბენზინიანი ბოთლით წავიდა ცეცხლისკენ. კოცონთან იგი მოულოდნელად დაეცა და ბენზინი ნაკვერჩხალს მიესხა, რის გამოც ცეცხლი აალდა და ალმა კაცი დაწვა.

მეორე ვერსიით კი დაშავებულმა ბენზინი დალია, მასთან ახლოს მყოფმა კი ცეცხლი მოუკიდა.

შინაგან საქმეთა სამინისტროში გვითხრეს, რომ გამოძიება სისხლის სამართლის კოდექსის 124–ე მუხლით გრძელდება, რაც ჯანმრთელობის გაუფრთხილებლობით დაზიანებას გულისხმობს.

[მარიამ ბარძიმაძე, ახალციხე]