‘პაციენტი მძიმეა, სტაბილიზაციას ვინარჩუნებთ’ – ექიმი კლდეში დამწვარ კაცზე

39 წლის კაცი დამწვრობის ცენტრის რეანიმაციულ განყოფილებაში წევს.

„დამწვარი აქვს სახე, თავი მთლიანად, გულ–მკერდის წინ ზედაპირი, მუცლის წინაზედაპირი, ორივე ზემოკიდური და მტევნები. მიუხედავად ფართობისა და ტრამვის სიღრმისა, ამ ეტაპზე სტაბილიზიაციას ვინარჩუნებთ, გონზეა ადეკვატურია, სასუნთქი გზების დაზიანება კითხვის ნიშნის ქვეშაა. პაციენტი მძიმეა, რა თქმა უნდა, ესეთი დიაგნოზი გარკვეულ საფრთხეებს შეიცავს“, - ამბობს ცენტრის ხელმძღვანელი გუგა ქაშიბაძე.

ახალციხის სოფელ კლდეში, 39 წლის კაცმა ცეცხლისგან გულ–მკერდის არესა და სახეზე დამწვრობა მიიღო. როგორც ადგილობრივები ამბობენ, იგი ნასვამ მდგომარეობაში იმყოფებოდა.

შემთხვევა 26 ივნისს საღამოს მოხდა. აღნშნულ ფაქტთან დაკავშირებით რამდენიმე ვერსია ვრცელდება.ერთი ვერსიით, 39 წლის კაცი მეგობრებთან ერთად ღია ცის ქვეშ, კოცონთან ქეიფობდა. როცა ცეცხლი მინელდა კაცმა გადაწყვიტა, რომ იგი ხელახლა დაენთო, რისთვისაც ბენზინიანი ბოთლით წავიდა ცეცხლისკენ. კოცონთან იგი მოულოდნელად დაეცა და ბენზინიანი ბოთლი ნაკვერჩხალს მიესხა, რის გამოც ცეცხლი აალდა და ალმა კაცი დაწვა.

მეორე ვერსიით კი დაშავებულმა ბენზინი დალია, მასთან ახლოს მყოფმა კი ცეცხლი მოუკიდა.

შინაგან საქმეთა სამინისტროს ინფორმაციით, გამოძიება დაწყებულია სისხლის სამართლის კოდექსის 124–ე მუხლით, რაც ჯანმრთელობის გაუფრთხილებლობით დაზიანებას გულისხმობს.

[მარიამ ბარძიმაძე, ახალციხე]