'ნასვამი იყო და ცეცხლის ალი მოედო' - რა მოხდა სოფელ კლდეში

შემთხვევა გუშინ, 26 ივნისს საღამოს მოხდა. 1981 წელს დაბადებულ კაცს დამწვრობა გულ–მკერდისა და სახის არეში აქვს. როგორ მოედო მას ცეცხლი სხეულზე, ადგილობრივები ვერ აკონკრეტებენ: „რამდენიმე კაცი ყოფილან სვამდნენო, ერთს ბენზინი დაულევია, როგორც ჩანს, მეორემ ცეცხლი მოუკიდა. 35% დამწვარი აქვს და თბილისში ალბათ დამწვრობის ცენტრში წაიყვანე, რეანიმაციაშია“, – ამბობს ერთ–ერთი ადგილობრივი.

დამწვრობს ფაქტს ადასტურებს სოფელ კლდის რწმუნებულიც. დავით პაპუაშვილი ამბობს, რომ ცეცხლის გაჩენის მიზეზი მისთვისაც უცნობია, თუმცა ფაქტის შესახებ იცის.

„მამამისს ველაპარაკე და დამწვრობა აქვს მიღებულიო, მითხრა. როგორც ექიმები ამბობენ, მეორე ხარისხის დამწვრობააო. სავარაუდოდ, ნასვამი იყო და დილით უნახიათ რომ დამწვრობა ჰქონდა, ტკივილებმა შეაწუხა. მიზეზი არ ვიცი“, – ამბობს პაპუაშვილი.

ერთი ვერსიით, 39 წლის მამაკაცი მეგობრებთან ერთად ღია ცის ქვეშ, კოცონთან ქეიფობდა. როცა ცეცხლი მინელდა კაცმა გადაწყვიტა, რომ იგი ხელახლა დაენთო, რისთვისაც ბენზინიანი ბოთლით წავიდა ცეცხლისკენ. კოცონთან იგი მოულოდნელად დაეცა და ბენზინიანი ბოთლი ნაკვერჩხალს მიესხა, რის გამოც ცეცხლი აალდა და ალმა მამაკაცი დაწვა.

სასწრაფო–სამედიცინო დაწესებულებაში „სამხრეთის კარიბჭესთან“ ამბობენ, რომ ფაქტზე სოფელ კლდეში სასწრაფო არ გამოუძახებიათ. გამოძახება არ ყოფილა არც საგანგებო სიტუაციების მართვის სამსახურში.

შინაგან საქმეთა სამინისტროს ინფორმაციით, გამოძიება დაწყებულია სისხლის სამართლის კოდექსის 124–ე მუხლით, რაც ჯანმრთელობის გაუფრთხილებლობით დაზიანებას გულისხმობს.

[თაკო ფეიქრიშვილი, ახალციხე]