ბიძინა ივანიშვილი: 'პარტიას საიმედო ხელში ვტოვებ'

პარტიის ხელმძღვანელები ბიძინა ივანიშვილმა დღეს, 24 ნოემბერს, კოალიცია "ქართული ოცნების" ყრილობაზე დაასახელა.

ბიძინა ივანიშვილმა მადლობა გამოუცხადა თანაგუნდელებს ნდობისთვის და აღნიშნა, რომ პარტიის შექმნის ურთუეს პერიოდში მისი პირველი თანამოაზრე სწორედ ირაკლი ღარიბაშვილი იყო.

"მაშინ ირაკლიმ ბევრ განსაცდელს გაუძლო. ყველას გახსოვთ, როგორ დაუპატიმრეს ოჯახის წევრი და, ამის მიუხედავად, ერთი წუთით არ დაუხევია უკან - იყო პარტიის დაარსების საინიციატივო ჯგუფის წევრი და პირველივე დღიდან პარტიის გამორჩეული სახე. ამიტომაც დარწმუნებული ვარ, რომ მასზე უკეთ ვერავინ წარუძღვება პარტიას. ირაკლის, ახალგაზრდა ასაკის მიუხედავად, პოლიტიკური ალღოც აქვს და ორგანიზაციული ნიჭიც. მჯერა, რომ ირაკლი ღირსეულად ატარებს ამ ტვირთს, გაამართლებს ჩვენს ნდობას და მისი თავმჯდომარეობით პარტია კიდევ უფრო გაძლიერდება და უკეთ ორგანიზებული იქნება", - განაცხადა პარტიის უკვე ყოფილმა თავმჯდომარემ.

პარტიის გენერალურ მდივნად კი მან კახი კალაძე დაასახელა: "გთავაზობთ კახი კალაძის კანდიდატურას, რომელიც გამორჩეული სახეა ჩვენს პარტიაში, გამორჩეულია თავისი ნიჭიერებით და პასუხისმგებლობით. ჯერ სულ ახალგაზრდაა პოლიტიკაში და, ნახეთ, როგორი შესაშური მიზანსწრაფულობა და შეუპოვრობა გამოიჩინა. ყველაფერთან ერთად, კახი ყველასთვის საყვარელი და პატივსაცემი ადამიანია. ასე რომ, პარტიას საიმედო ხელში ვტოვებ!" - განაცხადა ივანიშვილმა.

[Sknews.ge]