ადიგენში სასულიერო პირის მიწაზე ხელისუფლების წარმომადგენლებმა მესხური ვაზი დარგეს

სოფელ ბენარასთან რვა სახეობის მესხური ჯიშის ვაზი: მესხური მწვანე, ჩიტის თვალა, ხარისთვალა, კლერტმაგარა, ცხენის ძუძუ, თამარის ვაზი, შავი ასპინძურა და ხიხვი, უდის ანთიმოზ ივერიელის სახელობის მამათა მონასტრის წინამძღვარმა მამა გრიგოლმა, სამცხე–ჯავახეთის მხარის რწმუნებულმა ბესიკ ამირანაშვილმა, ადიგენის მუნიციპალიტეტის მერიის და საკრებულოს თანამშრომლებმა და კლუბ „ტაოს“ მორაგბეებმა დარგეს.

ვაზის დარგვის პორცესში მონაწილეობდნენ სასულიერო პირებიც.

ნაკვეთი ადიგენის მუნიციპალიტეტში, სოფელ ბენარასთან, ცენტრალურ საავტომობილო გზასთან მდებარეობს. ის საპატრირქომ 2019 წლის სექტემბერში დაიკანონა. საჯარო რეესტრის ამონაწერების მიხედვით, მიწის ნაკვეთი სახელმწიფო საკუთრება იყო და სახელმწიფო ტყის ფონდში შედიოდა. თუმცა ახალციხისა და ტაო–კლარჯეთის ეპარქიის მიმართვის და ადიგენის მუნიციპალიტეტის მერიის დასტურის შემდეგ, მიწის ნაკვეთი საპატრიარქოს გადაეცა. რეესტრის მიხედვით აღნიშნულ ნაკვეთი იჯარის ხელშეკრულებით ირაკლი ქურციძეს (გრიგოლ ქურციკიძეს) მიმდინარე წლის თებერვალში გადაეცა და მიწით სარგებლობა 2045 წლამდე შეეძლება.

[რიმა სარუხანიან, ახალციხე]