აუდიტი: წყალმომარაგების კომპანია ვერ უზრუნველყოფს ხარისხის სათანადო კონტროლს

აუდიტის სამსახურის თანახმად, წყალმომარაგების კომპანიას არ აქვს შემუშავებული სასმელი წყლის უსაფროების გეგმები, რაც სისტემური ჩავარდნის რისკებს ზრდის „შესაბამისად, კომპანიის მიერ სასმელი წყლის ხარისხზე კონტროლი არ შეიძლება ჩაითვალოს სათანადოდ ორგანიზებულად და ყოვლისმომცველად“.

ანგარიშში ასევე საუბარია მონიტორინგისთვის ერთიანი ელექტრონული ბაზის არასებობასა და კომპანიის მიერ კონტროლის მიმდინარეობისას გათვალისწინებული რეგლამენტის დარღვევით.

ამავე ანგარიშის მიხედვით, კომპანიას არ აქვს დამტკიცებული ინსტრუქცია, რომლის მიხედვითაც იმოქმედებს წყლის ხარისხში გადახრების აღმოჩენის შემთხვევაში

„კომპანიის სამუშაო პროგრამებში არ არის გაწერილი იდენტიფიცირებული პოტენციური საფრთხეები და შემოწმებათა საჭირო რაოდენობა რეგლამენტით გათვალისწინებული მაჩვენებლების მიხედვით, ასევე სანიტარული დაცვის ზონების და რეზერვუარების მდგომარეობის შემოწმებების მიზნით, ადგილზე ვიზუალური ინსპექტირებები და მათი პერიოდულობა. შესაბამისად, სამუშაო პროგრამები არსებული სახით ვერ უზრუნველყოფს სამუშაოების დაგეგმვა-განხორციელებას რეგლამენტის მოთხოვნების შესაბამისად და არ ითვლება პასუხისმგებელი პირებისთვის ზუსტ საოპერაციო მონიტორინგის გეგმად“ – ვკითხულობთ ანგარიშში.

სასმელი წყლის ხარისხის კონტროლის გარდა, „საქართველოს გაერთიანებული წყალმომარაგების კომპანიის“ 2017-2018 წლებში საქმიანობის შესწავლის შედეგად უწყებამ გამოავლინა:

• ბიუჯეტის ათვისების ნაკლოვანებები
• ბიუჯეტის ფორმირებასა და ბიზნესგეგმებთან დაკავშირებული ნაკლოვანებები
• შემოსავლების ფორმირებასთან დაკავშირებული ნაკლოვანებები
• შესყიდვებთან დაკავშირებული ნაკლოვანებები

აუდიტის სამსახურის რეკმენდაციების მიხედვით, წყალმომარაგების კომპანიამ:

• ჯანდაცვის მსოფლიო ორგანიზაციის რეკომენდაციების მიხედვით, შეიმუშაოს და დანერგოს წყლის უსაფრთხოების გეგმები.
• შექმნას ტექნიკური რეგლამენტით განსაზღვრული სასმელი წყლის ხარისხის კონტროლის და მონიტორინგის შედეგების ამსახველი ინფორმაციის ერთიანი ელექტრონული ბაზა და უზრუნველყოს დაინტერესებული პირებისთვის აღნიშნული ინფორმაციის პროაქტიული საჯაროობა.
• შიდა საზედამხედველო მექანიზმების და შიდა აუდიტის მეშვეობით, უზრუნველყოს წყლის ხარისხის კონტროლის მონაცემების რეგულარული დამუშავება, შეფასება, პერიოდული ანგარიშების მომზადება და მიღებული შედეგების გამოყენება მოკლევადიანი და გრძელვადიანი დაგეგმვის პროცესში.
• მიწოდებული სასმელი წყლის ხარისხის მონიტორინგი და კონტროლი უზრუნველყოს რეგლამენტის მოთხოვნების შესაბამისად, ხოლო დასაბუთებული საჭიროების შემთხვევაში, მოამზადოს წინადადებები რეგლამენტში ცვლილებების დადგენილი წესით ინიცირებისათვის.

იხილეთ აუდიტის ანგარიში სრულად იხილეთ აქ.

[რობი ზარიძე, ახალციხე]