‘ვითხოვთ გამოძიების დაჩქარებას’ - მოსწავლის ბულინგის საქმეზე ადვოკატმა პროკურატურას მიმართა

ადვოკატის განცხადება სამცხე-ჯავახეთის საოლქო პროკურატურაში, გუშინ 23 ივნისს მოსწავლის მშობელმა შეიტანა.

„ჩვენ ვითხოვდით გამოძიების დაჩქარებას და იმ პირების, ან იმ პირის გამოკვეთას ვინც არასრულწლოვანს მიაყენა ფსიქიკური ზიანი“, - აცხადებს რევაზიშვილი.

ბებია, ამბობს, რომ მასწავლებელი, რომელმაც მის შვილიშვილს ზიანი მიაყენა, სკოლაში არ უნდა მუშაობდეს.

„რატომ უნდა იყოს ის დღესაც სკოლაში და ასწავლიდეს. სამხარაულის დასკვნაში წერია, რომ ჩემს შვილიშვილს ფსიქიკური ტანჯვა და ზიანი მიადგა. ახლა ამ განცხადებას თუ არ დააკმაყოფილებს პროკურატურა შემდეგ გენერალურ პროკურატურაში შევიტანთ, არ გავჩერდებით. გუბერნატორთანაც ვიყავი დღეს და საქმე თავიდან ბოლონდე გავაცანი, დამპირდა რომ დაინტერესდება ამ საქმით და გაერკვევა სიტუაციაში“,- ამბობს 12 წლის მოსწავლის ბებია.

აღნიშნულ საქმეზე გამოძიება თავიდან ძალადობის მუხლით მიმდინარეობდა, თუმცა შემდეგ არასრულწლოვნის მიმართ დამამცირებელ ან არაადამიანურ მოპყრობის მუხლით, გადაკვალიფიცირდა, ბიჭი კი დაზარალებულად ცნეს.

ბიჭის ბებია ამბობს, რომ მისი შვილიშვილის ბულინგის მიზეზი ის გახდა, რომ მოზარდმა სკოლაში მომხდარი ჩხუბის დროს პოლიციაში დარეკა. 12 წლის ბიჭზე ზეწოლა ორ თვეზე მეტ ხანს გაგრძელდა, რის შედეგადაც მას ფსიქიკური პრობლემები დაეწყო.

[მარიამ ბარძიმაძე,ახალციხე]