პანდემია და მშენებლობისგან გამოწვეული დისკომფორტი - აბასთუმანი სეზონზე ცარიელია

მაისში, დამტვერვის პერიოდში აბასთუმანში დამსვენებლების მინიმალური რაოდენობა ჩავიდა. მიუხედავად იმისა, რომ აქ დასვენების ფასი, გასულ წლებთან შედარებით უფრო გაიაფდა, მსურველების რაოდენობა მაინც არ მატულობს.

აბასთუმანში ამბობენ, რომ აქ დამსვენებელთა ნაკადი ორ ეტაპად მოდის. მაისში, დამტვერვის დროს და ივლისი-სექტემბრის პერიოდში. პირველმა ეტაპმა უკვე ჩაიარა. თუმცა აქაურები ამბობენ, რომ პრობლემა მხოლოდ კორონავირუსის პანდემიას არ გამოუწვევია. როგორც დამსვენებლებისთვის, ასევე მასპინძლებისთვის დისკომფორტს გადათხრილი ქუჩები და სამშენებლო სამუშაოებისგან გამოწვეული მტვერი და უგზოობაც ქმნის.

„მაისში იყვნენ, მაგრამ შარშანდელთან შედარებით, ძალიან ნაკლებად. ახლა უკვე ფასებიც დავაკელით, თუ შარშან 60-70 ლარად ვაქირავებდით, ახლა 50 ლარი ღირს, მაგრამ არ არიან დამსვენებლები. თან ეს გზებიც აყრილია, მტვერია, სამუშაოები მიმდინარეობს და ალბათ ურჩევნიათ სხვაგან დაისვენონ“, - ამბობს ადგილობრივი რამაზ ათოშვილი.

მისი ოჯახი აბასთუმანში ხუთსაწოლიან ბინას ყოველწლიურად აქირავებს, თუმცა წელს ჯერ დამსვენებლები არ ჰყავთ: „ნეტა ვინმე იყოს და დავაკლებთ ფასს. კერძო ბინებს ზოგი 10 ლარით, ზოგი 20 ლარით ნაკლებ ფასს ადებს. წელს ჯერ არავის დაუჯავშნია, დარეკეს და ბოდიშიც მოგვიხადეს, რომ ვერ მოვდივართო“, - ამბობს თამარ ათოშვილი.



მთავარ ქუჩაზე მიმდინარე სამშენებლო სამუშაოები რომ მტვერსა და დისკომფორტს იწვევს, ადგილობრივების გარდა დამსვენებლებიც ადასტურებენ:

„სამშენებლო სამუშაოები რომ არის, ცოტა დისკომფორტია, მაგრამ აქ ყოფნა გვჭირდება და ამის გამო იძულებულები ვართ, რომ დავრჩეთ. ორი კვირაა უკვე აქ ვართ, თბილისიდან ჩამოვედით და კმაყოფილები ვართ, ფასები არ არის საგანგაშო, კოტეჯი გვაქვს აღებული და ერთ ღამეში ვიხდით 70 ლარს“, - ამბობს დამსვენებელი ქეთევან ბახუტაშვილი.

აბასთუმანში მცხოვრები ზინა ძინძიბაძე, რომელიც კერძო სახლში ოთახებს 40 ლარად აქირავებდა, წელს დამსვენებლის მიღებაზე უარი თავად თქვა, რადგან კორონავირუსის გავრცელების ეშინიათ: „კერძო სახლი მაქვს და ვაქირავებ ხოლმე, მაგრამ წელს ვერავის შევუშვებ. ბავშვები მყავს და ძალიან მეშინია. მაისში ჩამოდიოდნენ ხოლმე, მაგრამ წელს ძალიან იშვიათად არიან დამსვენებლები“.

ინფექციის გარცელების ასეთივე შიში აქვთ სხვა ადგილობრივებსაც. მათი თქმით, უმჯობესი იქნება, თუ კურორტზე შემსვლელები გაკონტროლდებიან. ასე აბასთუმნის მცხოვრებლებიც უფრო დაცულები იქნებიან:

„წელს არ არიან დამსვენებლები, შარშან უფრო ბევრნი იყვნენ. ალბათ ეშინიათ კიდეც. მაისში კი არის დამტვერვა, მაგრამ დაემთხვა წვიმებიც, გადათხარეს-გადმოთხარეს აკეთებენ რაღაცეებს. პრემიერმა გამოაცხადა მწვანე ზონად და მართლა ასეა, აქ არაფერი ინფექცია არ იქნება, ვიღაცამ თუ არ შემოიტანა და ხალხიც იმიტომ ერიდება ჩამოსვლას. მივესალმებოდით, რომ ახალციხეში დაიკეტოს და იქ შემოწმდნენ ადამიანები აქვთ თუ არა სიცხე. იმიტომ, რომ კერძო სახლებში რომ შემოდიან, საერთოდ ვერ გებულობ ვინმე არის თუ არა ინფიცირებული“, - ამბობს ერთ-ერთი ადგილობრივი.

აბასთუმანში არსებულმა საოჯახო სასტუმროების ნაწილმა მათთვის დაწესებული რეკომენდაციები უკვე შეასრულა. ახლა დამსვენებლის მოლოდინით ივლისსაც ელოდებიან.

„ჯანდაცვის სამინისტროდან იყვნენ, სპეციალური რეკომენდაციები მოგვცეს, რომლებიც გავითვალისწინეთ და მერე მოგვცეს გახსნის უფლება. 8 ივნისამდე ისედაც აკრძალურლი იყო სასტუმროების მუშაობა და 10-ში ჩვენც გვახსენით“, - ამბობს საოჯახო სასტუმრო „მწვანე სასტუმროს’ მეპატრონე თემურ ვარდიძე.

მისივე თქმით, ივლისისთვის რამდენიმე ჯავშანი უკვე არის, თუმცა არა იმ რაოდენობის, როგორც შარშან იყო: „სხვა წლებში ასე იყო, რომ გაზაფხულზე უკვე ზაფხულის ჯავშნებს ვიღებდით, რადგან მერე უკვე ადგილები ივსებოდა. წელს არ არის იმდენი ჯავშანი, რომ გადატვირთული იყოს. ივლისისთვის გვაქვს ჯავშნები, მაგრამ ძალიან ცოტა. ვფიქრობთ, რომ ჯერ კიდევ გაურკვევლობა იყო, არ იცოდა ხალხმა რა სიტუაცია იქნებოდა და არ დაჯავშნა“.



იმის გამო, რომ ჯერ დამსვენებელი არ ჩამოსულა, ყოველდღიურად თითქმის ცარიელია კურორტის ერთადერთი მცირე პარკი „როშა“. აქ მხოლოდ ისინი იყრიან თავს, ვინც აბასთუმნის, როგორც კურორტის მნიშვნელობა კარგად ესმის და პანდემიაც არ აშინებს. ერთ-ერთი ასეთია მსოფლიო ჩემპიონი თავისუფალ ჭიდაობაში, თეიმურაზ ხაბაძე. იგი აბასთუმანს ყოველწლიურად ერთი თვით სტუმრობს.

„20 წელია, გადაბმულად ყოველ წელს ჩამოვდივარ. მაისის ბოლოსთვის მოვდივარ მთელი თვე. პატარა დისკომფორტია, რომ გზაზე მტვერია, მაგრამ ეგ არაფერი. ეს ერთ-ერთი მსოფლიოში საუკეთესო კურორტია, ამაზე მშრალი ჰავა არ არსებობს მსოფლიოში. არის შვეიცარიაში ერთი წერტილი და ადრე გვეგონა, რომ 2%-ით იქ უფრო შედარებით მშრალი კლიმატი იყო, ვიდრე აქ. მაგრამ 2001 წელს, ჩამოვიდნენ შვეიცარიელი ექსპერტები და დადგინდა, რომ აბასთუმანში 3.6-ჯერ უფრო მშრალი ჰავაა, ვიდრე შვეიცარიის კურორტზე“.



ჯერ არ გახსნილა აბასთუმნის პარკში არსებული ერთადერთი კაფე. მის ადმინისტრაციაში ამბობენ, რომ მაისში დამსვენებელი არ იყო და საკვები ობიექტის ამუშავებას აზრი არ ჰქონდა: „მაისში დამსვენებელი არ იყო, ახლა ვემზადებით და ერთ კვირაში გავხსნით. ვნახოთ რა იქნება“, - ამბობს კაფე „როშას“ მეპატრონე პავლე ბათმანაშვილი.

2 ივნისს გაიხსნა აბასთუმანში არსებული საკალმახეც.



ღირებულება

აბასთუმანში დასვენებისა და ღამის გათევის ღირებულება იმის მიხედვით განსხვავდება, კერძო სახლის ქირაობა გინდათ, კოტეჯის, საოჯახო სასტუმროს თუ კომფორტული სასტუმროს.

კერძო კოტეჯის შემთხვევაში ფასები 60 ლარიდან იწყება.

კერძო სახლში ბინას 40-50 ლარის ფარგლებში ნახავთ.

საოჯახო სასტუმროებში, ორი ადამიანი სამჯერადი კვებით ღამეში 120 ლარი დაგიჯდებათ.

ოჯახის შემთხვევაში ფასები იმატებს.

რაც შეეხება სასტუმროებს აქ ფასები 300 ლარიდან იწყება.





[თაკო ფეიქრიშვილი, ადიგენი]