აბასთუმნის რეაბილიტირებული სახლები და დაუსრულებელი ეზოები [ფოტო]

აბასთუმანში 18 ისტორიული სახლის რეაბილიტაციისთვის 3 715 305 ლარი იყო განსაზღვრული. სამუშაოები 2018 წლის აპრილში დაიწყო და იგი ტენდერში გამარჯვებულმა ერთობლივმა საწარმომ შპს „ერისიმედმა“ და შპს „კამარომ“ შეასრულეს.

მათი ინფორმაციით, ამ ეტაპზე, ყველა სახლში რეაბილიტაცია დასრულებულია და ყველა მეპატრონე, რომელსაც ბინა საკუთრებაში ჰქონდა, რეაბილიტირებულ შენობაში უკვე ცხოვრობს: „არანაირი სამუშაოები არ არის დარჩენილი, ახლა უბრალოდ ვამოწმებთ, როგორ შესრულდა სამუშაოები“, - ამბობს სააქციო საზოგადოება „ერისიმედის“ სამეთვალყურეო საბჭოს თავმჯდომარე გურამ კოკაია.

კითხვაზე, რატომ არის ცარიელი რამდენიმე შენობა, კოკაია გვპასუხობს, რომ ისინი სახელმწიფო საკუკთრებაშია და ჯერ კერძო მესაკუთრე არ ჰაყვს: „ჯერ არ ჰყავთ მაგ სახლს მეპატრონე და როდესაც სახელმწიფო გადაწყვეტს რა გაკეთდეს, როგორ გაკეთდეს, მერე მიეცემა ფუნქცია. რაც შეეხება შენობას, სადაც გამგეობა უნდა განთავსდეს, გამეგეობა არის შესახლების პროცესში. ვისაც კი კერძო საკუთრება აქვს, ყველა კერძო საკუთრებაში ცხოვრობენ“.

მიუხედავად ამისა, კომპანიის თანამშრომლები რეაბილიტირებულ შენობებში გარკვეულ სამუშაოებს ისევ ასრულებენ. გარდა ამისა, სამუშაო და სამშენებლო პროცესია სახლებს გარეთ. ყოველ ორ ნაბიჯში, რეაბილიტირებული შენობების წინ მძიმე ტექნიკა დგას, გადათხილია ეზოები და მუშაობს ცოცხალი ძალაც.

„პატარ-პატარა რაღაცებია დარჩენილი, მაგრამ ეგ გაკეთდება, მთავარია, ძირითადი რაც არის მთლიანად კარგად არის. ძველი სურათი მქონდა და ზუსტად ასეთია, რაც აქ არის“, - ამბობს ადგილობრივი მიხეილ დალაქიშვილი.

18 ისტორიული სახლის რეაბილიტაცია მუნიციპალური განვითარების ფონდის პროექტია, რომელსაც მსოფლიო ბანკი აფინანსებს.





























[თაკო ფეიქრიშვილი, ადიგენი]