სად არის სავალდებულო პირბადის ტარება - დადგენილება

მთავრობის ადმინისტრაციის ხელმძღვანელმა ნათია მეზურნიშვილმა მედიასთან განმარტა, რომ საქართველოს მთავრობამ დადგენილება დღეს, 15 ივნისს მიიღო. „ჩვენ ეს დადგენილება დღეს მივიღეთ, რომლითაც განისაზღვრა ის დახურული სივრცეები, სადაც პირბადის ტარება მოქალაქეებისთვის, ისევე როგორც ამ დაწესებულებების თანამშრომლებისთვის იქნება სავალდებულო. ზოგიერთი კატეგორიის ადამიანებისთვის, მათი ჯანმრთელობის მდგომარეობიდან და ასაკიდან გამომდინარე, დაწესდა გარკვეული გამონაკლისები, კერძოდ, ამ ადამიანებს პირბადის არ ტარების შემთხვევაში არ დაეკისრებათ კანონით განსაზღვრული პასუხისმგებლობა“.

პირბადის ტარება სავალდებულო იქნება:

- საჯარო და კერძო დაწესებულებების მისაღებში, ე.წ ფრანტ-ნაწილებზე, სადაც ადამიანების ყველაზე მეტი რაოდენობა იყრის თავს.
- საჯარო და კერძო დაწესებულებებში გამართულ შეხვედრებზე თავშეყრისას, სადაც შეუძლებელია 2 მეტრი სოციალური დისტანციის დაცვა - „მაგალითად, უწყებათაშორისი საბჭოს სხდომაზე, თუ შეუძლებელი იქნება 2 მეტრიანი დისტანციის დაცვა, სავალდებულო იქნება პირბადის ტარება“.
- შეხვედრებზე თავშეყრისას, გამომსვლელს/მომხსენებელს, შეუძლია არ გამოიყენოს პირბადე გამოსვლისას/მოხსენების გაკეთებისას, თუ ამ ადამიანს შეუძლია 2 მეტრიანი დისტანციის დაცვა.
- საერთო სარგებლობის ლიფტებში, სავაჭრო ობიექტებში, რომლებიც მაღალი რისკის შემცველი დახურული სივრცეებია.
- სილამაზის სალონებსა და ესთეტიკური მედიცინის ცენტრებში, სადაც ვირუსის გავრცელების რისკი მაღალია.
- ზოგადსაგანმანათლებლო, პროფესიულ და უმაღლეს საგანამათლებლო დაწესებულებებში.
- საზოგადოებრივ ტრანსპორტში. მათ შორის, მეტროპოლიტენსა და ტაქსებში.

დასაშვები იქნება, როგორც სამედიცინო, ასევე არასამედიცინო დანიშნულების პირბადე.

გამონაკლისები - ეს წესი არ შეეხება:

- 6 წლამდე ასაკის ბავშვებს.

-იმ ადამიანებს, ვისაც აქვთ სასუნთქი სისტემის პრობლემა, მათ შორის, ფილტვის ქრონიკული დაავადებები, ბრონქული ასთმა,

- შეზღუდული შესაძლებლობის მქონე პირებსა და გარკვეული კატეგორიის პირებს, რომლებსაც ჯანმრთელობის მდგომარეობიდან გამომდინარე არ შეუძლიათ პირბადის ტარება.

- არ იქნება სავალდებულო პირბადის გამოყენება სპეციალიზებულ დაწესებულებაში მომსახურე პერსონალისთვის, შესაბამისი სამიზნე ჯგუფისთვის, კონკრეტული სოციალური სერვისის მიწოდებისას, კონკრეტული სარეაბილიტაციო მომსახურების მიწოდებისას, მაგალითად, ლოგოპედის მომსახურეობისას.

[თაკო ფეიქრიშვილი]