44 წლის კაცმა ვალეს პოლიციის უფროსს სცემა

ფოტო: ვალეს ფეისბუკის გვერდიდან

შემთხვევა 26 მაისს, ვალეს პოლიციის შენობაში მოხდა, ზ.კ იმ დროს ალკოჰოლის ზემოქმედების ქვეშ იმყოფებოდა. როგორც ბრალდებულის ადვოკატი, ნუგზარ სამარჯიშვილი ამბობს, მისი დაცვის ქვეშ მყოფი პოლიციაში ახალი უფროსის ვინაობის გასარკვევად მივიდა.

„ზ.კ 26 მაისს გასვენებაში იმყოფებოდა, შემდეგ კიდევ დალია დამოუკიდებლობის დღესთან დაკავშირებით. გაიგო რომ ვალეს პოლიციას ახალი უფროსი ჰყავდა გვარად ბერიძე. მას ნათესავი პოლიციელი ჰყავს კახეთში ამავე გვარის და ეგონა რომ ის გადმოიყვანეს ვალეში. პოლიციაში იმ მიზნით მივიდა, რომ სახლში დაეპატიჟებინა. როცა იკითხა ვინ არის უფროსიო, ბერიძემაც უთხრა მე ვარო და ჩემი დაცვის ქვეშ მყოფს ეგონა ეხუმრებოდნენ, რადგან თავის ახლობელს ელოდა, ამიტომ მხარი და ხელი დაარტყა. ამის შემდეგ დააკავეს“, - ამბობს ადვოკატი.

მისი თქმით, ბრალდებული აფხაზეთის მონაწილეა და მას ფსიქიკური პრობლემები აქვს: "იმ ომის მონაწილე, რომელი გინახავთ, ვისაც ფსიქიკური პრობლემები არ აქვს. ცნობა გვაქვს სასამართლოში წარდგენილი, რომლის მიხედვითაც, მისი ალკოჰოლის მიღება კატეგორიულად არ შეიძლებოდა და ალკოჰოლის მიღების შემთხვევაში ფსიქიკურ დარღვევას იწვევდა. თუ არ მოხდებოდა ამ კაცის პროვოცირება, არ იზავდა ამას, გამორიცხულია".

გამოძიება სისხლის სამართლის კოდექსით 353 პრიმა მუხლით მიმდინარეობს, რაც პოლიციელზე თავდასხმას გულისხმობს. ეს მუხლი პატიმრობას 4 დან 7 წლამდე ითვალისწინებს.

აღნიშნულ საქმეზე სასამართლო პროცესი ახალციხის რაიონულ სასამართლოში დღეს, 29 მაისს გაიმართა, მოსამართლე მარიკა ჩიტაშვილმა ზ.კ პატიმრობაში დატოვა, მისი ადვოკატი ნუგზარ სამარჯიშვილი დაკავებულის 10 000 ლარიანი გირაოს სანაცვლოდ გათავისუფლებას ითხოვდა.

[მარიამ ბარძიმაძე,ახალციხე]