თბილისში მოსახლეობის საყოველთაო აღწერის მოსამზადებელი სამუშაოები იწყება

ამის შესახებ საქართველოს რეგიონული განვითარებისა და ინფრასტრუქტურის მინისტრმა დავით ნარმანიამ და საქსტატის აღმასრულებელი დირექტორის მოვალეობის შემსრულებელმა თენგიზ ცეკვავამ დღევანდელ პრესკონფერენციაზე ისაუბრეს.

მოსახლეობის საყოველთაო აღწერის მოსამზადებლად, თბილისში, ორი კვირის განმავლობაში საქსტატის რიგითი რეგისტრატორები ივლიან. ისინი დედაქალაქში არსებული შენობებისა და მათში ფაქტიურად მცხოვრები ოჯახების სიებს შეადგენენ. ამისათვის, საქსტატმა 800 რეგისტრატორი მოამზადა.

საქართველოს რეგიონული განვითარებისა და ინფრასტრუქტურის მინისტრის განმარტებით, საქსტატის რეგისტრატორებს თავზე კეპები ეხურებათ და ბეიჯები ექნებათ. დავით ნარმანიამ მოსახლეობას მიმართა, რომ ასეთ ადამიანებს კარი გაუღონ და ინფორმაცია მიაწოდონ, რამდენი ადამიანი ცხოვრობს ოჯახში.

თენგიზ ცეკვავას განმარტებით კი, საქსტატის რეგისტრატორები ოჯახის წარმომადგენლებს მხოლოდ 2 კითხვას დაუსვამენ, რამდენი ადამიანი ცხოვრობს ოჯახში და ოჯახის უფროსის სახელი და გვარი. მისივე თქმით, აღნიშნული ინფორმაცია მათ დაეხმარებათ საბოლოო აღწერის მოსამზადებლად, რომელიც საქართველოში ერთი წლის შემდეგ, 5-19 ნოემბერს ჩატარდება.

საქართველოს რეგიონული განვითარებისა და ინფრასტრუქტურის სამინისტროს ინფორმაციით მოსახლეობის საყოველთაო აღწერა საქართველოში ბოლოს 2002 წელს ჩატარდა. ამ აღწერის მიხედვით, თბილისში 300 000 ოჯახი დაფიქსირდა.

თბილისის შემდეგ, მოსახლეობის საყოველთაო აღწერისთვის მოსამზადებელი სამუშაოები სამეგრელოსა და სამცხე-ჯავახეთში გაგრძელდება, ხოლო მთლიანად მოსახლეობის აღწერის საველე სამუშაოები მაისში დასრულდება.

საქართველოს მოსახლეობის 2014 წლის საყოველთაო აღწერის ფარგლებში მოსამზადებელი სამუშაოები უკვე ჩატარდა აჭარაში, გურიასა და კახეთში.

[sknews.ge]