თვითდასაქმებულები კომპენსაციის მისაღებად რეგისტრაციას დღეიდან შეძლებენ

თვითდასაქმებულებმა, (მოვაჭრე, ძიძა, ხელოსანი, დამლაგებელი, მძღოლი, რომელსაც მგზავრები დასახლებული პუნქტიდან მუნიციპალიტეტის ცენტრში გადაჰყავს; პირი, რომელიც ამზადებდა სუვენირებს და აბარებდა სუვენირების მაღაზიას), რომლებიც რეგისტრირებულნი არ არიან შემოსავლების სამსახურში, ჯანდაცვის სამინისტროს ვებგვერდზე – www.moh.gov.ge უნდა შეავსონ შემდეგი ინფორმაცია:

▶სახელი, გვარი და პირადი ნომერი;
▶საკონტაქტო მონაცემები (ფაქტობრივი საცხოვრებელი მისამართი და საკონტაქტო ტელეფონი);
▶საბანკო ანგარიშის რეკვიზიტები;

ასევე უნდა ატვირთონ შემდეგი დოკუმენტები:

▶გადასახადის გადამხდელად რეგისტრირებული პირის (გარდა არამეწარმე ფიზიკური პირისა) მიერ გაცემული პირველადი საგადასახადო დოკუმენტი, რომლითაც დასტურდება შემოსავლის მიღების ფაქტი (წერილობითი დოკუმენტი, რომლითაც შესაძლებელია საქონლის მიწოდების/მომსახურების გაწევის მონაწილე მხარეთა იდენტიფიცირება, აქვს თარიღი და მოიცავს მიწოდებული საქონლის/გაწეული მომსახურების ჩამონათვალსა და ღირებულებას. მაგალითად, შესყიდვის აქტი, მიღება-ჩაბარების აქტი);

▶2020 წლის პირველი სამი თვის საბანკო ამონაწერი, რომლითაც დასტურდება ეკონომიკური საქმიანობიდან მიღებული შემოსავალი;

▶მუნიციპალიტეტის ან სხვა ადმინისტრაციული ორგანოს მიერ პირზე გაცემული რაიმე საქმიანობის დამადასტურებელი ცნობა ნებართვა/ლიცენზია;

▶საქართველოში რეგისტრირებული იურიდიული პირის მიერ გაცემული დოკუმენტი, რომლითაც დასტურდება პირის ეკონომიკური აქტივობა ან/და შემოსავალი;

თვითდასაქმებულებს (ცირე ბიზნესის სტატუსის მქონე მეწარმე ფიზიკურ პირები; მეწარმე ფიზიკურ პირები; პირები, რომლებიც ახორციელებენ ფიქსირებული გადასახადით დასაბეგრ საქმიანობას; მიკრობიზნესის სტატუსის მქონე მეწარმეები; ინდივიდუალური მეწარმეები), რომლებიც რეგისტრირებულნი არიან შემოსავლების სამსახურში ვებგვერდზე – www.moh.gov.ge განაცხადის შესავსებად არ დაჭირდებათ შემოსავლის წყაროს მტკიცებულების წარდგენა.

რეგისტრაციისთვის ფიზიკურმა პირმა უნდა შეავსოს შემდეგი ინფორმაცია: სახელი, გვარი და პირადი ნომერი; საკონტაქტო მონაცემები (ფაქტობრივი საცხოვრებელი მისამართი და საკონტაქტო ტელეფონი); საბანკო რეკვიზიტები (ბანკის ანგარიშის ნომერი);

მიღებული განაცხადები დამუშავდება და კომპენსაცია გადაირიცხება რეგისტრაციიდან არაუგვიანეს 10 სამუშაო დღეში. დამატებითი ინფორმაციის მიღება პირს შეეძლება ჯანდაცვის სამინისტროს ცხელ ხაზზე 1505.

[sknews.ge]