რა დოკუმენტები სჭირდებათ თვითდასაქმებულებს კომპენსაციის მისაღებად

კომპენსაციის მიღების მიზნით ფიზიკურმა პირმა ელექტრონული ფორმით უნდა წარადგინოს შემდეგი ინფორმაცია:

• სახელი, გვარი და პირადი ნომერი;
• საკონტაქტო მონაცემები (ფაქტობრივი საცხოვრებელი მისამართი და საკონტაქტო ტელეფონი);
• საბანკო ანგარიშის რეკვიზიტები;
• ინფორმაცია 2020 წლის პირველ კვარტალში მისი შემოსავლის წყაროს შესახებ;
• 2020 წლის პირველ კვარტალში შემოსავლის წყაროს დამადასტურებელი დოკუმენტი, მათ შორის:

- გადასახადის გადამხდელად რეგისტრირებული პირის (გარდა არამეწარმე ფიზიკური პირისა) მიერ გაცემული პირველადი საგადასახადო დოკუმენტი, რომლითაც დასტურდება შემოსავლის მიღების ფაქტი (წერილობითი დოკუმენტი, რომლითაც შესაძლებელია საქონლის მიწოდების/მომსახურების გაწევის მონაწილე მხარეთა იდენტიფიცირება, აქვს თარიღი და მოიცავს მიწოდებული საქონლის/გაწეული მომსახურების ჩამონათვალსა და ღირებულებას. მაგალითად შესყიდვის აქტი, მიღება ჩაბარების აქტი);

- 2020 წლის პირველი 3 თვის საბანკო ამონაწერი, რომლითაც დასტურდება ეკონომიკური საქმიანობიდან მიღებული შემოსავალი;

- მუნიციპალიტეტის ან სხვა ადმინისტრაციული ორგანოს მიერ პირზე გაცემული რაიმე საქმიანობის დამადასტურებელი ცნობა ნებართვა/ლიცენზია;

- საქართველოში რეგისტრირებული იურიდიული პირის მიერ გაცემული დოკუმენტი, რომლითაც დასტურდება პირის ეკონომიკური აქტივობა ან/და შემოსავალი;

წარდგენილ ელექტრონულ განაცხადებს, სააგენტო სამუშაო ჯგუფთან ერთად განიხილავს ორი კვირის ვადაში.

კომისიის გადაწყვეტილებიდან 10 სამუშაო დღის ვადაში, სააგენტო კომპენსაციის თანხას განცხადებაში მითითებულ საბანკო ანგარიშზე ჩარიცხავს.
იმ პირებს, რომელთა განცხადებებიც არ დაკმაყოფილდება, სააგენტო გადაწყვეტილების მიღებიდან 15 სამუშაო დღის ვადაში მოკლე ტექსტური შეტყობინების სახით მიაწვდის ინფორმაციას კომპენსაციის გაცემაზე უარის შესახებ.

[თაკო ფეიქრიშვილი]