დავით ჩილინგარაშვილი - აშშ-ს ეროვნული გვარდიის სამხედრო Covid 19-თან ბრძოლაში

კონექტიკუტის ეროვნულ გვარდიაში დავითი უკვე სამი წელია მსახურობს. ამ სამხედრო ნაწილის მოვალეობა შტატში კრიზისული სიტუაციის მართვაა. შესაბამისად, COVID 19-ის პანდემიის გამოცხადების შემდეგ, კონექტიკუტის შტატმა გვარდიას მობილიზება გაუკეთა და საქმეში სამხედრო ნაწილები ჩაერთო.

„რადგანაც ინფიცირებულთა რიცხვი ძალიან დიდია, შტატი სამოქალაქო სამედიცინო პერსონალის ნაკლებობას განიცდიდა, ამიტომ მოუწიათ სამხედრო ექიმების ჩართვა. პირადად მე ვარ ერთ-ერთი მათგანი, რომელიც უზრუნველყოფს სამხედრო ექიმების ყოველდღიურ ტრანსპორტირებას საავადმყოფოებში“, - ამბობს „სამხრეთის კარიბჭესთან“ დავითი და ამატებს, რომ ინფიცირებულთა მაღალი მაჩვენებლის გამო, საავადმყოფოები პაციენტებს ვერ იტევდა, რის გამოც, მის სამხედრო ნაწილს დაევალა საველე საავადმყოფოების აგება უნივერსიტეტებისა და სკოლების სპორტდარბაზებში: „ყოველდღიურად ვწმენდთ და დეზინფექციას ვუკეთებთ საჯარო სივრცეებს. მოვამარაგეთ საავადმყოფოები და საველე საავადმყოფოები სასუნთქი აპარატებით, პირბადეებითა და სადეზინფექციო ხსნარებით. დიდ ქალაქებში მოვაწყვეთ პუნქტები, სადაც მოქალაქეებს შეუძლიათ გაიკეთონ სწრაფი ტესტირება COVID 19-ზე“.

დავით ჩილინგარაშვილი, სხვა სამხედროების მსგავსად, 12 საათიან რეჟიმში მორიგეობს. რამდენიმე დღის წინ დაინფიცირებას გადაურჩა.

„7 ექიმი, რომელთა გადაადგილებასაც ყოველდღიურად მე ვუზრუნველყოფდი, სამწუხაროდ, დაინფიცირდა და მათ გამო, მეც მომიწია ტესტის ჩატარება. რამდენიმე დღე კარანტინშიც ვიყავი, რადგანაც პირადად მე მქონდა მათთან შეხება. საბედნიეროდ, ჩემს ტესტზე პასუხი უარყოფითი იყო“.

დავითი ამბობს, რომ მისი სამხედრო ნაწილის მოვალეობა კრიტიკული მდგომარეობის დროს მზადყოფნაა, ამიტომ ასეთ რთულ მდგომარეობაშიც კი მუშაობა მათთვის სირთულეს არ წარმოადგენს.

“იმის გამო, რომ ჩემი შტატი ნიუ–იორკის მეზობელი შტატია და ნიუ–იორკი, როგორც ცნობილია, ამერიკაში ვირუსის ეპიცენტრია, ჩვენთანაც ძალიან სწრაფად გავრცელდა ვირუსი. სამწუხაროდ, აპრილის თვეში გარდაცვლილთა რაოდენობა მაღალი იყო, ძირითადად მოხუცებულები და სხვადასხვა თანმხლები დაავადების მქონე ადამიანები იღუპებოდნენ. მაისიდან მდგომარეობა უკეთესადაა. გარდაცვლილთა რაოდენობამ იკლო და გამოჯანმრთელებულთა რაოდენობამ იმატა“.

მიუხედავად მდგომარეობის გაუმჯობესებისა, შტატში ბევრი დაწესებულება ისევ დაკეტილია. მუშაობს მხოლოდ სასურსათო მაღაზიები, აფთიაქები, ბანკები, ბენზინგასამართი სადგურები და კვების ობიექტების მიტანის სერვისები: „რადგანაც მაისის დასაწყისიდან პროგრესი შეიმჩნევა, შტატის გუბერნატორმა ნედ ლამონტმა გასცა განკარგულება 20 მაისიდან ნაწილობრივ გაიხსნას სხვადასხვა მომსახურების ცენტრები გარკვეული შეზღუდვებით: აუცილებელია პირბადის ქონა, სოციალური დისტანციის დაცვა, რესტორნებში და მაღაზიებში აკონტროლებენ ხალხის რაოდენობას. ეს იქნება პირველი ეტაპი საბოლოო გახსნისკენ“.

Covid 19-მა დავით ჩილინგარაშვილის ცხოვრება შეცვალა. პანდემიამდე იგი ერთ-ერთ კომპანიაში ციფრული მარკეტინგისა და ანალიტიკის მიმართულებით მუშაობდა, გარდა ამისა, სწავლობდა უნივერსიტეტშიც: „მარტის დასაწყისში უნივერსიტეტი გადავიდა ონლაინ სწავლაზე, მობილიზაციის გამოცხადების გამო კი მომიწია დროებით დამეტოვებინა ჩემი სამსახური. დიდი იმედი მაქვს, რამდენიმე კვირაში ყველაფერი გამოსწორდება და დავუბრუნდებით ნორმალურ ცხოვრებას“.

[თაკო ფეიქრიშვილი]