რამ განაპირობა საქართველოში კორონავირუსით გარდაცვალების დაბალი მაჩვენებელი – ცერცვაძის განმარტება

„შეიძლება, არ დაიჯეროთ და არ მოიხსენიოთ პოზიტიურად, რომ ჩვენთან რაღაც სხვაზე უკეთესად გაკეთდა. შეგიძლიათ ეს ყველაფერი არ დამიჯეროთ, მაგრამ რას უზავთ იმას, რომ ჩვენთნ მხოლოდ ექვსი ადამიანია გარდაცვლილი და სხვაგან 6 000 ან 60 000, შედეგებით ხომ იზომება ყველაფერი?! როცა ქვეყანაში ექვსი ადამიანია გარდაცვლილი და სხვაგან უფრო მეტი იქ უნდა დაუჯერო“, – განაცხადა ტელეკომპანია "პირველთან" თენგიზ ცერცვაძემ.

იგი დაბალი მაჩვენებლების ორ ძირითად მიზეზს ასახელებს.

„პაციენტები ძალიან მოვლილები არიან. არ მითხრათ, რომ რომელიმე ქვეყანაში ასე უვლიან პაციენტებს, რომ 24 საათი ექიმი თავზე ედგას. უბრალოდ, არ შედის ეს სამედიცინო პერსონალის მოვალეობაში. საქართველოში ერთი ადამიანიც არ მეგულება, რომელმაც დაახველა ან სიცხემ აუწია და ის 24 საათის განმავლობაში არ იყოს გამოკვლეული და მოვლილი. ამას დაემატა ის, რომ არამარტო ცხელების ცენტრებში, არამედ ყველა კლინიკაში ფილტვების ანთებიანს იკვლევენ კოვიდზე, ასეთი რამ სხვა ქვეყანაში არ ხდება“, – თქვა ცერცვაძემ.

მისი თქმით, არც ერთ პაციენტს არ მკურნალობენ ტრაფარეტურად და სტანდარტულად.

„თითოეულ პაციენტს არ ვმკურნალობთ ტრაფარეტულად და სტანდარტულად. ვიღაცას ვთქვათ რაღაც მაჩვენებელი შეეცვალა? იმ მაჩვენებლის კორექციას ვცდილობთ. იქნება ეს ბაქტერიული გართულება, თუ ციტოკინური შტორმი, თუ სისხლის შემდედებელ სისტემაში ცვლილება და ა.შ. ეს ჯამში იძლევა ამ შედეგს “, – თქვა ცერცვაძემ.

თენგიზ ცერცვაძემ ასევე ყურდღება გაამახვილა და აღნიშნა, რომ მოსახლეობას არ უნდა ჰქონდეს გადაჭარბებული წარმოდგენა იმაზე, რომ გაჯანმრთელებული პაციენტების პლაზმის გადასხმით მასიურად მოხდება ხალხის გადარჩენა, რადგან ამდენი დონორი ქვეყანს ვერ ეყოლება.

საქართველოში კორონავირუსით ინფიცირების შემთხვევა 26 აპრილს გამოვლინდა, ინფექციით გარდაცვალების პირველი შემთხვევა კი ოთხ აპრილს დაფიქსირდა.

30 აპრილის მონაცემებით, ქვეყანაში ინფიცირების 539 შემთხვევაა გამოვლენილი, აქედან გამოჯანმრთელდა 179, გარდაიცვალა ექვსი.

[ნუკა სტეფნაძე]