ქეთევან ხმალაძის ცემა-წამების საქმეზე სტრასბურგის გადაწყვეტილებას ელოდებიან

ნინოწმინდაში მომხდარი ყაჩაღობის საქმე დასრულებულია, თუმცა სტრასბურგის სასამართლო ყაჩაღობაში მსჯავრდებულის, ქეთევან ხმალაძის საქმეს განიხილავს. ხმალაძის ადვოკატმა, „ადამიანის უფლებათა ცენტრის“ იურისტმა, ეკა ქობესაშვილმა „ადამიანის უფლებათა ევრპულმა სასამართლოს“ 2019 წლის ივნისში მიმართა.

ადვოკატი „სამხრეთის კარიბჭესთან“ ამბობს, რომ სტრასბურგის სასამართლომ სახელმწიფოს მსხვერპლისთვის კონპენსაციის გადახდა შესთავაზა, თუმცა მორიგება არ შედგა.

„ადამიანის უფლებათა ევროპულმა სასამართლომ ერთი თვის გასვლის შემდეგ, სახელმწიფოს შეტყობინება გამოუგზავნა, სადაც სთავაზობდა სახელმწიფოს ჩვენთან მორიგებას და კომპენსაციის სახით თანხის გადახდას, თუმცა სახელმწიფომ უარი თქვა მორიგების შემოთავაზებაზე. ახლა ველოდებით სტრასბურგის სასამართლოს გადაწყვეტილებას“, - ამბობს ქობესაშვილი.

პოლიციელების მხრიდან განხორციელებული ფიზიკური ზეწოლის შესახებ, პატიმრობაში მყოფმა ქეთევან ხმალაძემ „სამხრეთის კარიბჭესთან“ ციხიდან განხორციელებული სატელეფონო ზარის მეშვეობით ისაუბრა.

ამ საქმის გამოძიებას ხმალაძე 2017 წელსაც მოითხოვდა: „16 საათი, დაკავების შემდეგ, პოლიციაში, პირუტყვებივით გვირტყამდნენ. სამხარეოს უფროსი თემურაზ კალანდაძე მცემდა. ეს საჩივარშიც მივუთითე. გამომძიებელმა გიორგი ფარცახაშვილმა კი დოკუმენტებს ხელს რომ არ ვაწერდი, ორი თითი მომტეხა. ამ საქმის ძიება დაიწყო, ერთხელ დამკითხეს, მაგრამ ამის შემდეგ აღარაფერი ყოფილა“, - იხსენებდა ხმალაძე „სამხრეთის კარიბჭესთან“.

რაც შეეხება ყაჩაღობის საქმეს, რომელში მსჯავრდებულიც ქეთევან ხმალაძეა, იგი უზენაესმა სასამართლომ წარმოებაში არ მიიღო და დასრულებულია.

„დაახლოებით ექვსი თვის წინ მივამართეთ უზენაეს სასამართლოს და წარმოებაში არ მიიღო, საქმე მთლიანად დასრუდა“, - ამბობს ადვოკატი.

ცნობისთვის, საქმე შეეხება 2016 წელს ნინოწმინდაში მომხდარ მკვლელობასა და ყაჩაღობას.

ახალციხის რაიონულმა სასამართლომ 2016 წლის 13 იანვარს ნინოწმინდაში, ჩარენცის ქუჩაზე მომხდარი ყაჩაღობისა და მკვლელობის საქმეში ბრალდებულად 5 პირი ცნო. მოსამართლე გოჩა ჯეირანაშვილმა, ამ ხუთიდან ერთი, თემურ ბერიძე დამნაშავედ მხოლოდ ყაჩაღობაში ცნო და მას 11 წლითა და 6 თვით მიესაჯა პატიმრობა. ასევე 11 წელსა და 6 თვეს გაატარებენ საპატიმროში, ყაჩაღობაში ბრალდებული ნოდარ ართმელაძე და კობა შევარდენიძე. 11 წელი მიუსაჯა მოსამართლემ ივანე გელაშვილს და 9 წელი ქეთევან ხმალაძეს, რომელსაც ბრალი ყაჩაღობაში ედება.

სააპელაციო სასამართლომ ახალციხის რაიონული სასამართლოს გადაწყვეტილება ძალაში დატოვა.

[თაკო ფეიქრიშვილი, ახალციხე]