ახალციხეში ორმეტრიანი დისტანციისთვის ქუჩები მონიშნეს [ვიდეო]

ვიდეოს სოციალურ ქსელში პედაგოგი ზურა ინასარიძე ავრცელებს. ქუჩების მოხატვას ორგანიზება მერიის თანამშრომლება გაუწიეს.

“მერიის ღონისძიება იყო და ჩვენ გვთხოვეს გაგვეკეთებინა მონიშვნები იმ ობიექტებთან, რომლებიც აგრძელებენ მუშაობას საგანგებო მდგომარეობის პერიოდში, თან სახალისო ვიდეოც გადავიღეთ“ – ამბობს ზურა ინასარიძე.

საქართველოში 21 მარტს შემოღებული საგანგებო მდგომარეობა კიდევ უფრო გამკაცრდა. 31 მარტიდან ქვეყანაში მოქმედებს საყოველთაო საკარანტინო რეჟიმი და ე.წ კომენდანტის საათი. იკრძალება სამ ადამიანზე მეტის თავშეყრა, ასევე სავალდებულოა ორმეტრიანი დისტანციის დაცვა სავაჭრო ობიექტებში. თუმცა ამის მიუხედავად ბანკებსა და ბანკომატებთან მაინც შეინიშნება ხალხმრავლობა და რიგები.

ე.წ კომენდანტის საათის გამოცხადების შემდეგ, ქვეყნის მთელ ტერიტორიაზე აიკრძალა გადაადგილება 21:00–დან 6:00 საათამდე. დღის განმავლობაში კი 70 წელზე მეტი ასაკის პირებს ეკრძალებათ სახლიდან გასვლა გარდა აუციულებელი საჭიროებისა. მოქალაქეებმა ქუჩაში გადაადგილებისას თან უნდა იქონიონ პირადობის დამადასტურებელი მოწმობა.

ამ დროისთვის ქვეყანაში კორონავირუსის გავრცელების მაჩვენებელი ასეთია:

დადასტურებული შემთხვევა – 115
გამოჯანმრთელებული – 22
კარანტინში – 5783
სტაციონარში მეთვალყურეობუის ქვეშ – 301



ასევე ნახეთ: #დარჩისახლში – ახალციხელი პედაგოგი მოსწავლეებს სიმღერით მოუწოდებს

[რობი ზარიძე, ახალციხე]