პატიმრებს 15 წუთიანი უფასო სასაუბრო დრო მიეცემათ - წულუკიანი

იუსტიციის მინისტრის, თეა წულუკიანის განმარტებით, მსჯავრდებულებსა და ბრალდებულებში პაემნების აკრძალვამ დისკომფორტი გამოიწვია, ამიტომ „16 მარტიდან დაწესდა შეღავათი, რომელიც გულისხმობს 15 წუთიან უფასო სასაუბრო დროს, ყოველი თვის განმავლობაში“.

დაახლოებით ერთი თვეა, ახალი პატიმრები 21 დღიან საკარანტინო პერიოდს გადიან და ამის შემდეგ უერთდებიან ძველ კონტიგენტს: „ეს არ გახლავთ ის საკარანტინო სივრცე, რომელსაც ციხის ენაზე უწოდებენ კარანტინს, ეს არის ჩვეულებრივი საცხოვრებელი კორპუსი, შესაბამისი პირობებით, რომელიც მოწყობილია მიმღებ ციხეებში, იქ არის, როგორც კანონმდებლობის, ასევე ევროპული კონვენციის შესაბამისად შექმნილი პირობები ჩვენი პატიმრებისთვის. 21 დღეს გაატარებენ იქ ახალი პატიმრები და თუ რაიმე საეჭვო სიმპტომი არ გამოუვლინდებათ, შეერევიან ძველ კონტიგენტს“, - ამბობს წულუკიანი.

მინისტრის თქმით, საგანგებო მდგომარეობის გამოცხადებიდან დღემდე 26 პატიმარი მიიღეს, ექვსი კი უკვე გაეწერა. ვირუსი არცერთ მათგანს დაუდასტურდა.

20 მარიტიდან კონტროლი დაწესდა ციხის თანამშრომლებზეც. სიმპტომების აღმოჩენის შემთხვევაში მათ სახლში აბრუნებენ: „20 მარტიდან დღემდე 100 თანამშრომელი გააბრუნა სახლში, ხოლო 80 გარედაცვის ინსპექტორი. 23 მარტიდან აიკრძალა დამლაგებლების შეშვება ციხეებში, კერძო კომპანია და ათეულობით ადამიანი, რომლებიც შედიოდნენ დაწესებულებებში და ალაგებდნენ ამ ტერიტორიებს, ისინი 23 მარტიდან აღარ ხვდებიან დაწესებულებაში. ციხის ადმინისტრაცია საკუთარი ფიზიკური შესაძლებლობებით უზრუნველყოფს ციხის დალაგებას“.

24 მარტიდან აიკრძალა პატიმრების გაყვანა სასამართლოებში და პროცესები აეწყო ონლაინ.

„მომავალი კვირის დასაწყისში გეგმას გავაცნობთ საზოგადოებას, რომელზეც ვმუშაობთ, რომ პენიტენციური დაწესებულებები კორონავირუსის აღმოფხვრამდე კიდევ უფრო ჩაკეტილი გახდეს ციხეები“, - განაცხადა წულუკიანმა.

მისივე თქმით, ციხის სასურსათო მაღაზიები საკვების ნაკლებობას არ განიცდის.

[sknews.ge]