‘ინფიცირებული პაციენტებიდან მაქსიმალური ასაკი 82, მინიმალური 2 წელია’ - იმნაძე

25 მარტს გამართულ ბრიფინგზე, პაატა იმნაძემ განმარტა, რომ ინფიცირებულთა საშუალო ასაკი 37 წელია.

რაც შეეხება დღევანდელ სამ ახალ შემთხვევას, ერთი საფრანგეთთან არის დაკავშირებული, ორი კი ამერიკასთან.

ბრიფინგზე საუბარი შეეხო მარნეულში მცხოვრებ 62 წლის ინფიცირებულ ქალსაც. ჟურნალისტების კითხვაზე, მოიქცა თუ არა „ჯეო ჰოსპიტალი“ და ადგილობრივი ეპიდსამსახური სწორად, როდესაც პნევმონიის მქონე ქალს საავადმყოფოში მკურნალობდნენ და დროულად არ მოხდა მისი ტესტირება, იმნაძემ უპასუხა: „კლინიკა და ეპიდსამსახური მოიქცა აბსოლუტურად სწორად, იმიტომ რომ არ შეიძლება რაღაცეების მართვა დამტკიცებული პროტოკოლების გარეშე. არსებობს ჯანმრთელობის მსოფლიო ორგანიზაციის მიერ მოწოდებული, შესაძლო შემთხვევის განსაზღვრისთვის. ანუ არ შეიძლება ერთი ექიმი ერთ რაღაცას ეძახდეს ერთ რამეს და მეორე ექიმი საქართველოს მეორე კუთხეში სხვას აკეთებდეს. ეს უნდა იყოს მოწესრიგებული“, - განაცხადა იმნაძემ.

ცნობისთვის, საქართველოში კორონავირუსის 73 დადასტურებული შემთხვევაა, მათ შორის გამოჯანმრთელებული - 10 ;

სტაციონარში მეთვალყურეობის ქვეშ - 252;

კარანტინის რეჟიმში იმყოფება- 4 055 პირი.

[sknews.ge]