‘ახალციხის ციხეზე’ ვიზიტორების რაოდენობა მკვეთრად შემცირდა

„ახალციხის ციხის“ დირექტორის დავით ტაბატაძის განმარტებით, გასული თვეებისგან განსხვავებით, ვიზიტორების რაოდენობა შემცირებულია. პრევენციის მიზნით, ადმინისტრაცია დაავადებათა კონტროლის ეროვნული ცენტის რეკომენდაციებს ითვალისწინებს: „კონკრეტულად ვერცერთ ქვეყანას გამოვყოფ, საიდან უფრო იკლო ვიზიტორების რაოდენობამ. ზოგადად, ყველა ქვეყნიდან შემცირდა. შემცირებულია ასევე საქართველოს სხვა რეგიონებიდან მომსვლელთა რაოდენობა. ჩვენ ყველა რეკომენდაციას ვითავლისწინებთ, რაც აქამდე მოგვცეს“.

მისივე თქმით, მაღალი რისკის მქონე ქვეყნებიდან „ახალციხის ციხეზე“ შემოსულ ტურისტებს, საჭიროების შემთხვევაში, სპეციალური სამსახურები აკონტროლებენ.

„ჩვენ გვაქვს რეკომენდაციები, რომ თუ ტურისტი შემოსულია, იტალიიდან, კორეიდან, ჩინეთიდან ან მსგავსი ტიპის ქვეყნებიდან, სადაც უფრო გავრცელებულია კორონავირუსი, ვთანამშრომლობთ ჯანდაცვასთან. ვრეკავთ, მოდიან ამოწმებენ პასპორტებს, თუ საიდან შემოვიდნენ და როდის. საჭიროების შემთხვევაში, თავად მიაქცევენ ყურადღებას. რაიმე განსაკუთრებული ღონისძიებები და შეზღუდვები არ გაქვს“, – განმარტა დავით ტაბატაძემ.

რაც შეეხება ადმინისტრაციის მუშაობას, დახურულ ზონებს, როგორიც არის მუზეუმი, საინფორმაციო ცენტრი, ადმინისტრაციული შენობა და საკონფერენციო დარბაზი, კვირაში ორჯერ დეზინფექცია უტარდება.

ტაბატაძის თქმით, თუ იქნება რეკომენდაცია ციხის დახურვასთან დაკავშირებით, ადმინისტრაცია გაითვალისწინებს - “ამ ეტაპზე ამის საჭიროება არ არსებობს და არც მსგავსი რეკომენდაციები გვაქვს მიღებული“.

[ნუკა სტეფნაძე, ახალციხე]