სამცხე–ჯავახეთში უცხოელ ვიზიტორთა რაოდენობა შემცირდა

საქსტატის ინფორმაციით, მიმდინარე წელს, ივნისის ჩათვლით, სამცხე-ჯავახეთს 65 252 ვიზიტორი ესტუმრა, რაც გასული წლის ამავე პერიოდის მაჩვენებელზე მნიშვნელოვნად მცირეა. 2018 წელს, ექვს თვეში რეგიონში სულ 89 835 საერთაშორისო ვიზიტორი იმყოფებოდა.

ტურიზმის ეროვნული ადმინისტრაციის მიერ „სამხრეთის კარიბჭესთვის“ მიწოდებული ინფორმაციის მიხედვით, ვიზიტორთა რაოდენობა რეგიონის მთავარ ტურისტულ ობიექტებზეც შემცირდა.

ბორჯომში მინერალურ წყლებს, ლიკანს, მწვანე მონასტერს, ტიმოთესუბანს, ეროვნულ პარკს და მუნიციპალიტეტის სხვა ტურისტულ ობიექტებს 2018 წლის პირველ კვარტალში 37 192 საერთაშორისო ვიზიტორი ეწვია. 2019 წლის პირველ კვარტალში კი - 14 698.

ბაკურიანს 2018 წლის პირველ კვარტალში 29 279 ვიზიტორი ეწვია, 2019 წლის ამავე პერიოდში კი, 20 079.

ტურიზმის ეროვნული ადმინისტრაცია ვარძიის, ვანის ქვაბების, საფარისა და ხერთვისის ვიზიტორებს აჯამებს. ამ ობიექტებს 2018 წელს 3 730 უცხოელი ეწვია, 2019 წლის პირველ კვარტალში კი 1 378.

მკვეთრად შემცირდა საერთაშორისო ვიზიტორების რაოდენობა ახალციხის ციხეზეც. მიმდინარე წლის იარვარ-მარტის პერიოდში, ციხეს 12 791 ვიზიტორი ესტუმრა, შარშან ამავე პერიოდში - 29 594 ვიზიტორი აღირიცხა.

ინფორმაცია, ნინოწმინდასა და ახალქალაქში ვიზიტორთა რაოდენობის შესახებ, ტურიზმის ეროვნულ ადმინისტრაციას არ გააჩნია. ამის მიზეზად, ადმინისტრაციაში ვიზიტორთა დათვლის მეთოდოლოგიას ასახელებენ: „ტურისტებს ვეკითხებით, თუ რა ადგილები მოინახულეს ქვეყანაში, ტურისტიც ადგილს წერს და არა მუნიციპალიტეტს, ამიტომ ვერ გეტყვით რამდენი ეწვია ახალქალაქს ან ნინოწმინდას“, – განმარტავს ტურიზმის ეროვნული ადმინისტრაციის კვლევებისა და დაგეგმვის სამმართველოს უფროსი, გიორგი ბრეგაძე.

[ავთო ინასარიძე, ახალციხე]