‘ვარძიამ’ და ‘ხერთვისის ციხემ’ ერთ წელში 1 331 286 ლარის შემოსავალი მიიღეს

საქართველოს კულტურული მემკვიდრეობის დაცვის ეროვნული სააგენტოს ინფორმაციით, „ვარძიის ისტორიულ–არქიტექტურულ მუზეუმ–ნაკრძალს“ 2019 წელს 172 756 ვიზიტორი ესტუმრა. მუზეუმის შემოსავალმა ერთი წლის მანძილზე 1 243 881 ლარი შეადგინა.

გასულ წელს „ხერთვისის ციხე“ 21 485 ვიზიტორმა დაათვალიერა, ამ პერიოდში ციხემ 87 405 ლარის შემოსავალი მიიღო.

ვიზიტორებს შორის, რამდენია ადგილობრივი და რამდენი სხვა ქვეყნის მოქალაქე, უცნობია, კულტურული მემკვიდრეობის დაცვის ეროვნულ სააგენტოში აცხადებენ, რომ ამ სტატისტიკას არ აწარმოებენ.

„ვინაიდან სააგენტოს სისტემაში შემავალი მუზეუმ–ნაკრძალების მომსახურების ტარიფი, როგორც ადგილობრივი, ისე უცხოელი ვიზიტორისთვის ერთი და იმავე ღირებულებით განისაზღვრება, სსიპ საქართველოს კულტურული მემკვიდრეობის დაცვის ეროვნული სააგენტოს მიერ არ ხორციელდება ვიზიტორთა მოქალაქეების შემოწმება, შესაბამისად, თქვენ მიერ მოთხოვნილი ინფორმაცია ადგილობრივ და უცხოელ დამთვალიერებელთა რაოდენობის შესახებ, სააგენტოს არ გააჩნია“– აღნიშნულია ჩვენს მიერ გამოთხოვილ ინფორმაციაში.

მიმდინარე წლის პირველი იანვრიდან, კულტურული მემკვიდრეობის დაცვის ეროვნული სააგენტოს დაქვემდებარებაში არსებულ მუზეუმებში ბილეთის ფასი გაიზარდა. მათ შორის ვარძიის და ხერთვისის მუზეუმ-ნაკრძალშიც.

ასევე შეგიძლიათ ნახოთ, თუ რამდენი ვიზიტორი ესტუმრა 2019 წელს ბორჯომის მუზეუმს



[ნუკა სტეფნაძე, ასპინძა]