საქართველოში კორონავირუსით ბავშვი დაინფიცირდა

აღნიშნულის შესახებ "ინტერპრესნიუსს" ინფექციური საავადმყოფოს დირექტორმა თენგიზ ცერცვაძემ განუცხადა.

მისივე თქმით, ბავშვი ინფექციურ საავადმყოფოში იმ ჯგუფის წევრებთან ერთად შეიყვანეს, რომლებიც თვითიზოლაციაში იმყოფებოდნენ და რომლებსაც ვირუსი განმეორებითი ტესტის შედეგად დღეს, 10 მარტს დაუდასტურდა.

10 მარტის მონაცემებით საქართველოში კორონავირუსით 23 პირია დაინფიცირებული. კარანტინის რეჟიმში 126 ადამიანია, ხოლო სტაციონარში მეთვალყურეობის ქვეშ — 46 პაციენტი.

ქვეყანაში კორონავირუსით ინფიცირების პირველი შემთხვევა 26 თებერვალს დადასტურდა. დაავადებული საქართველოს მოქალაქე ქვეყანაში ირანიდან შემოვიდა.

იმავე დღეს, საქართველოს მთავრობის გადაწყვეტილებით, სწავლა შეწყდა სკოლებსა და უნივერსიტეტებში, დაიკეტა ბაღები. ყველა საჯარო დაწესებულებაში ჩატარდა დეზინფექცია.

პირველ მარტს საკოორდინაციო საბჭომ თავშეყრის ადგილებში ხალხმრავალი ღონისძიებების გაუქმების შესახებ რეკომენდაცია გასცა.

ბოლო მონაცემებით, კორონავირუსს მსოფლიოში 4 095 ადამიანი ემსხვერპლა, 116 736 დაინფიცირდა, 64 752 კი გამოჯანმრთელდა. ამ დროისთვის COVID – 19 მსოფლიოს 115 ქვეყანაშია გავრცელებული.

[sknews.ge]