საქართველოში კორონავირუსის მეოთხე შემთხვევა დაფიქსირდა

ვირუსი საქართველოს 44 წლის მოქალაქეს დაუდგინდა, რომელიც იტალიაში იმყოფებოდა, სამშობლოში კი კვირას, პირველ მარტს დაბრუნდა.

"ბოლო შემთხვევა თავისი მოგზაურობის ისტორიით დაკავშირებულია იტალიასთან. არის საქართველოს მოქალაქე, რომელიც ქვეყანაში შემოვიდა კვირას თითქოს სიმპტომების გარეშე, შემდეგ განუვითარდა მაღალი ტემპერატურა და თავად მიმართა ინფექციურ საავადმყოფოს. ჩატარდა კვლევები და დადასტურდა დადებითი შემთხვევა", - განაცხადა ამირან გამყრელიძემ.

მისი თქმით, ოთხივე პაციენტი ინფექციურ საავადმყოფოში მკურნალობს: "სამი პაციენტის მდგომარეობა დამაკმაყოფილებელია, დაავადების პროგრესირება არ აღენიშნებათ, რაც შეეხება მეოთხე შემთხვევას, წინა სამთან შედარებით, უფრო საყურადღებოა კლინიკურად. მიმდინარეობს შესაბამისი კლინიკური კვლევები და დაკვირვება. უკვე ჩაერთო ჩვენი სამსახურები ეპიდკვლევის გაფართოების მიზნით, კონტაქტების შესწავლის მიზნით. დღეს დილისთვის გვაქვს დაახლოებით 20 კონტაქტი მოძიებული, მათ შორის 15 თვითმფრინავის კონტაქტი და მიმდინარეობს ამ ადამიანების ჩაღრმავებული ეპიდკვლევა".

ხუთი მარტის დილის მონაცემებით, ქვეყნის მასშტაბით 162 ადამიანია კარანტინში.

საქართველოში კორონავირუსის პირველი შემთხვევა, მიმდინარე წლის 26 თებერვალს დაფიქსირდა. დაავადებული საქართველოს მოქალაქე, 50 წლამდე კაცი, ქვეყანაში ირანიდან შემოვიდა. კორონავირუსის მეორე შემთხვევა საქართველოში 28 თებერვალს, მესამე კი 29 თებერვალს დადასტურდა.

კორონავირუსი მსოფლიოს 80 ქვეყანაშია გავრცელებული. ჯანმრთელობის მსოფლიო ორგანიზაციის სამი მარტის ანგარიშის მიხედვით, გლობალურად სულ დადასტურებულია COVID-19 -ის 90 870 შემთხვევა. ბოლო მონაცემებით, ვირუსს მსოფლიოს მასშტაბით 3 220 ადამიანი ემსხვერპლა, 51 193 კი გამოჯანრთელდა.

[sknews.ge]