პრეზიდენტი: საზოგადოება ერთგვარ დეპრესიაშია, საკუთარ თავს ვერ ვცნობთ

პრეზიდენტის სიტყვას, სხდომათა დარბაზში მხოლოდ მთავრობის წევრები და „ქართული ოცნების“ დეპუტატები ესწრებოდნენ. მოხსენების პარალელურად პარლამენტის მიმდებარედ გაიმართა აქციაც.

„იმის მაგივრად რომ ყველა ერთად, ჩვენი ძალით და რესურსით, ვფიქრობდეთ ქვეყნის მომავალსა და ამოცანების დაძლევაზე. გაბედულად ვეძებდეთ გამოსავალს, ახალ ინიციატივასა თუ იდეას, გაჩერებული ვართ და წრეზე ვტრიალებთ. ერთობის ნაცვლად ჭარბობს აგრესია, სიძულვილი, შური, შეურაცხყოფა. ყველაფერი რაც საზოგადოებას ნაწილებად შლის. ყველაფერი რაც ხელს გვიშლის გამოსავლის პოვნასა და წინსვლაში. აგრესიამ, სიძულვილმა, შეურაცხყოფამ შეცვალა ქართულ ღირებულათა სისტემა. მივიღეთ აგრესია შემწყნარებლობის ნაცვლად. შეურაცხყოფა - ზრდილობის ნაცვლად, ეგოიზმი -სოლიდარობის ნაცვლად. შიში - ტრადიციული სიმამაცის ნაცვლად. ღირებულებები, რომლებიც ქართული კულტურის წიაღიდან, ქრისტიანობიდან, რუსთაველიდანაა ამოზრდილი, დღეს მთლიანად, ან თითქმის მთლიანად უარყოფილია“, – განაცხადა სიტყვით გამოსვლისას პრეზიდენტმა.

მისი თმით, „ჩვენ გვჭირდება საკუთარი თავის დანახვა და შესაძლებლობების რეალურად შეფასება“.

საქართველოს მეხუთე პრეზიდენტი ამბობს, რომ პირველ რიგში უნდა დავძლიოთ დღევანდელი მტკივნეული სოციალური და ეკონომიკური პრობლემები.

„ამას სჭირდება მეტი ინიციატივა და მეტი სოლიდარობა ეკონომიკაში. ულტრალიბერალიზმის მახინჯი ფორმები ყველგან, და მათ შორის ჩვენთანაც, გადაფასებას ითხოვს. ხელი უნდა შევუწყოთ იმას, რაც ჩვენთვის ბუნებრივი და ტრადიციულია: ესაა შემოქმედებითი წარმოება - რისი მაგალითიც ღვინის წარმოებამ უკვე მოგვცა და რომელსაც დღევანდელ მსოფლიოში უდიდესი პოტენციალი გააჩნია. ამ ახალ ეკონომიკურ საწყისებში ჩვენი დიასპორის ჩართვა აუცილებელია, და ამისათვის ახალი ფორმები უნდა მოინახოს. ახალ ეკონომიკაში არ უნდა დავივიწყოთ ერთ-ერთი მთავარი ქართული ღირებულება - სოლიდარობა; სოლიდარობა თაობათა შორის, სოლიდარობა მოწყვლადი ჯგუფების მიმართ. ეს არის განვითარების ის გზა, რომელიც საქართველოს საქართველოსთან დააბრუნებს,“ - განაცხადა ზურაბიშვილმა.

[რობი ზარიძე, ახალციხე]