თამარ გოგოლაძე: ახალციხის მერიის გამარტივებული შესყიდვები კითხვებს აჩენს

გამარტივებული ტენდერების შესახებ თამარ გოგლაძემ პრეტენზია დღეს, 28 თებერვალს, ახალციხის საკრებულოს სხდომაზე გამოთქვა. მისი თქმით, მერია გამარტივებული ტენდერებისთვის საჭირო დოკუმენტაციას სრულად არ აგზავნის, რის გამოც მისთვის უცნობია, 5 000 ლარზე მაღალი ღირებულების გარკვეულ სამუშაოებზე რატომ არ ცხადდება ელექტრონული ტენდერი და რის საფუძველზე ფორმდება ხელშეკრულება გამარტივებული წესით.

„როდესაც შემოდის საკითხი მერიიდან უნდა მიეწეროს, რომ ამ განკარგულების საფუძველზე უნდა მოხდეს გამარტივებული შესყიდვა, იმიტომ, რომ მონიტორინგისთვის ეს არის აუცილებელი. მე პიროვნულად შეიძლება გესაუბრეთ და პასუხი გამეცით, მაგრამ ვამბობ, რომ უნდა იყოს დოკუმენტურად დასაბუთებული. ჩემთვის შეურაცხმყოფელია, როდესაც საფუძველს არ გვიგზავნის მერია ორგანოს, რომელმაც მონიტორინგი უნდა გავაკეთოთ“.

გოგოლაძეს პრეტენზიას ახალციხის მერის პირველმა მოადგილემ, გურამ მელიქიძემ უპასუხა: „წერილი დაწერეთ და გამოითხოვეთ“.

რაზეც გოგოლაძემ აღნიშნა, რომ მას წერილის წერა არ უნდა დასჭირდეს და ინფორმაციის მიწოდება მერიის ვალდებულებაა.

„კითხვები გამიჩნდა აქ ჩამოთვლილ საკითხებზე: სატრანსპორტო მომსახურება - 46 984 ლარი, საპროექტო დოკუმენტაცია - 12 768 ლარი, თამარ მეფისი ძეგლის რეაბილიტაცია - 6 000 ლარი, ადმინისტრაციული შენობაში, ხანძარი რომ მოხდა, ამაზე არის სამი ხელშეკრულება: 10 850ლარი, 88 409 ლარი, 299 094 ლარი, ადმინისტარციული შენობის დაცვა 80 400 ლარი... ეს თანხები ყველა 5 000-ზე მეტია და არის ყველა გამარტივებული შესყიდვით. სიტყვიერი ახსნა, რომ რომელიღაც ექსკლუზივია, ეს გადაუდებელია მდგომარეობაა, არ არის საკმარისი. როგორ არის გადაუდებელი აუცილებლობა ხანძრისა, როცა დღემდე აგერ მიმდინარეობს სამუშაოები“, - იკითხა გოგოლაძემ.

ახალციხის მერიის სახელმწიფო შესყიდვების სამსახურის ხელმძღვანელის, ქეთევან ინასარიძის თქმით, საფუძველი დოკუმენტურად არ არის წარმოდგენილი, თუმცა არსებობს: „ყველა ხელშეკრულებაში მიმთითებულია საფუძველი, უბრალოდ ახლა ასე არ არის წარმოდგენილი“.

დღევანდელს სხოდმაზე ინასარიძემ 2019 წლის განმავლობაში მერიის მიერ გაფორმებულ ხელშეკრულებებზე ისაუბრა. მისი თქმით, სულ 437 სახელმწიფო შესყიდვა განხორციელდა, მათი ჯამური ღირებულება კი 16 460 379 ლარია. მათ შორის:

- ელექტრონული ტენდერის მეშვეობით განხორციელდა: 133 სახელმწიფო შესყიდვა;
- გამარტივებული შესყიდვის მეშვეობით განხორცილედა 267 სახელწმიფო შესყიდვა;
-კონსოლიდირებული ტენდერის მეშვეობით განხორციელდა: 37 სახელმწიფო შესყიდვა.

[თაკო ფეიქრიშვილი, ახალციხე]