‘შოთაობის’ ორგანიზებისთვის მეორედ გამოცხადებული ტენდერი ჩაიშალა

„შოთაობა 2019“ ღონისძიებების ორგანიზებისთვის ტენდერი მეორედ 27 აგვისტოს გამოცხადდა. განაცხადების მიღების ბოლო ვადა ექვსი სექტემბერი იყო, თუმცა ტენდერი არ შედგა იმ მიზეზით, რომ განაცხადი არ შევიდა.

სახალხო დღესასწაულამდე ოთხი დღე რჩება. ამიტომ ასპინძის მერიის კულტურის სამსახურის უფროსის ოთარ ცინაძის თქმით, ტენდერის გამარტივებული შესყიდვა მოხდა, რომლის მიხედვითაც „შოთაობის“ ორგანიზებას ადგილობრივი ინდმეწარმე გიორგი ტივაძე, 20 313 ლარად განახორციელებს.

„რადგანაც ტენდერი ჩაიშალა, მოვითხოვეთ შესყიდვების სააგენტოსგან, რომ გამარტივებული წესით ხელშეკრულება დაგვედო ადგილობრივ ინდმეწარმესთან და ახლა „შოთაობის“ ორგანიზებისთვის სამუშაოები უკვე დაწყებულია“, – გვიხსნის ოთარ ცინაძე.

მისივე თქმით, 27 სექტემბერს სახალხო დღესასწაულისთვის ყველაფერი მზად იქნება. სოფელ რუსთავის შესასვლელში ფაცხების აგება და კონცერტისთვის სცენის მონტაჟი დაწყებულია.

სახალხო დღესასწაული „შოთაობა“ 2008 წლიდან აღდგა და იგი სოფელ რუსთავის ტერიტორიაზე იმართებოდა. 2013 წელს, ადგილობრივი თვითმმართველობის ცვლილებასთან ერთდ, ღონისძიების ჩატარების ადგილიც შეიცვალა და რუსთავიდან ვარძიაში გადაინაცვლა. ექვსი წლის შემდეგ, „შოთაობა“ ისევ სოფელ რუსთავში გაიმართება.

ასპინძის მერიაში „სამხრეთის კარიბჭეს“ განუმარტეს, რომ ვარძიის ტერიტორიაზე სამშენებლო სამუშაოები მიმდინარეობს და ამიტომ სახალხო დღესასწაული სოფელ რუსთავში ჩატარდება.

[ლუბა გიორგაძე, ასპინძა]