აწყურში ‘სოფლის მხარდაჭერის პროგრამით’ გათვალისწინებული შეხვედრა ჩაიშალა

საერთო კრება დღეს, 21 თებერვალს, 15:00 საათზე უნდა გამართულიყო. იმისათვის, რომ ინფრასტრუქტურული პროექტის განსახორციელებლად მოსახლეობას პრიორიტეტი შეერჩია, სხდომას 200 ადამიანი უნდა დასწრებოდა, თუმცა საკმარისი რაოდენობა არ შეგროვდა.

კრებაზე ადგილობრივი თვითმმართველობის, მერიისა და საკრებულოს წარმოამდგენლები იმყოფებოდნენ: „მოსახლეობის ჩართულობის პრობლემაა. აწყური დიდი სოფელია და 200 ადამიანი მაინც უნდა ყოფილიყო რომ დაგვეწყო სხდომა. სულ 72 ადამიანი მოვიდა“, - ამბობს საკრებულოს თავმჯდომარის მოადგილე იოსებ კაპანაძე.

იგი ირწმუნება, რომ მოსახლეობა შეხვედრის შესახებ ინფორმირებული იყო: „რწმუნებული, დეპუტატი, ყველა ჩართულები არიან. თვითონ მოსახლეობამ, ყველამ იცოდა და არ მოვიდა. სხვა სოფლებშიც რომ მომხდარიყო ასე, არც იქ ჩავატარებდით“.

კაპანაძის თქმით, ეს პირველი შემთხვევა იყო, როცა სოფლის კრებაზე ადგილობრივების საკმარისი რაოდენობა არ მივიდა: „თისელსა და ტყემლანაშიც გვქონდა კრებები. იქ ყველაფერი კანონის დაცვით იყო“.

ადგილობრივი თვითმმართველობა სოფლებში საერთო კრებებს ექვსი თებერვლიდან ატარებს. ამ დრომდე კრების ჩაშლის არცერთი შემთხვევა არ დაფიქსირებულა. დღეს საერთო კრება იმ დროს ჩაიშალა, როცა მას არასამთავრობო ორგანიზაციის წარმომადგენლები უნდა დასწრებოდნენ. აწყურში იმყოფებოდა „საერთაშორისო გამჭვირვალოვბა საქართველოს“ რეგიონული კოორდინატორი.

„სამოქალაქო საბჭოს ფარგლებში, მერიაში პრობლემების ჩამონათვალი გვაქვს შეტანილი, რის გათვალისწინებასაც ვითხოვთ. ამიტომ გვინდოდა დასწრება. მინდოდა, რომ მერიაში შეტანილი საკითხები დაეყენებინათ. მაგრამ ვერ შეგროვდა საკმარისი რაოდენობის ხალხი. სოფელში არის 1 200 ამომრჩეველი და კრებას უნდა დასწრებოდა 200 ადამიანი“, - ამბობს თამუნა უჩიძე.

წინასწარი ინფორმაციით, აწყურში კრება 28 თებერვლამდე გადაიდო.

„სოფლის მხარდაჭერის პროგრამის“ ფარგელბში, 2020 წლისთვის აწყურში 20 000 ლარია განსაზღვრული. რისი გაკეთება სურს მოსახლეობას ამ თანხით, თავად მათ უნდა გადაწყვიტონ.



[თაკო ფეიქრიშვილი, ახალციხე]