ვალეს ყოფილი რწმუნებულის ზურაბ ნასყიდაშვილის საქმის ადმინისტრაციული განხილვა, ახალციხის რაიონულ სასამართლოში, დღეს, 25 ოქტომბერს გაიმართა. იგი ახალციხის მუნიციპალიტეტის გამგებელმა ბესიკ ბლიაძემ სამსახურიდან მასზე დაკისრებული მოვალეობის შეუსრულებლობის გამო გაათავისუფლა.
ნასყიდაშვილმა, 26 აგვისტოს, თათბირზე, მიიღო დავალება , „სოფლის მხარდაჭერის პროგრამის“ ფარგლებში, ვალეში მოსახლეობის პრიორიტეტები გამოევლინა. როგორც თავად ამბობს, დავალება 30 აგვისტომდე უნდა შეესრულებინა, მაგრამ ვერ შეძლო. ამის შესახებ 2 სექტემბერს საკრებულოს თავმჯდომარესა და გამგებელს თათბირზე მოახსენა. 6 სექტემბერს კი სამსახურიდან გაათავისუფლეს, „საჯარო სამსახურის შესახებ კანონის“ 99-ე მუხლის მე-3 ნაწილის თანახმად.
უსამსახუროდ დარჩენილი ზურაბ ნასყიდაშვილი 6 სექტემბრის ბრძანების გაუქმებასა და პოზიციაზე დაბრუნებას მოითხოვს.
„მტკიცებულებების გამოკვლევა უკვე დასრულდა და თქვენ სასამართლომ მოგცათ გონივრული ვადა მორიგებისთვის...“ - მიმართა სასამართლო პროცესზე მოსარჩელე და მოპასუხე მხარეებს მოსამართლე გია ბერაიამ.
„მორიგება ვერ შედგა, არანაირი შემოთავაზება გამგეობიდან, სამსახურში, თუნდაც სხვა პოზიციაზე, დაბრუნებასთან დაკავშირებთ, არ მიგვიღია“, - უპასუხა მოსამართლეს ზურაბ ნასყიდაშვილის ადვოკატმა ნიკოლოზ ათუნაშვილმა.
არ დაეთანხმა მოსარჩელე მხარის განცხადებას, ახალციხის მუნიციპალიტეტის გამგეობის იურიდიული სამსახურის უფროსი ავთანდილ თელიაშვილი: „თქვენ თავად თქვით უარი მორიგებაზე, მაგრამ თუ თანახმა ხართ, მზად ვარ ამ საკითხთან დაკავშირებთ საქმის კურსში ჩავაყენო ხელმძღვანელობა“.
მისივე განცხადებით, კვლავ ვალეს რწმუნებულის თანამდებობაზე, არა მაგრამ სხვა პოზიციაზე ნასყიდაშვილის დაბრუნება შესაძლებელია.
კვლავ ვადის გახანგრძლივებაზე მორიგებასთან დაკავშირებით მოსარჩელე მხარემ უარი განაცხადა. ამის შემდეგ მხარეებს დრო პაექრობისთვის დაეთმოთ.
ნასყიდაშვილი ცდილობდა აეხსნა თუ რატომ ვერ შეძლო დათქმულ ვადაში პრიორიტეტის გამოვლენა: „მიუხედავად იმისა, რომ ვალეში 1500-მდე კომლია, საჭირო რაოდენობის ადამიანების შეკრება თათბირზე ვერ შევძელი, რადგან ამ დროს ყველა მთაში იყო წასული. ანუ ხალხი კი მოვიდა, მაგრამ ის ქვოტა ვერ შედგა, რომ პრიორიტეტი გამოგვევლინა“.
თელიაშვილის განცხადებით, წარმოუდგენელია, იქ, სადაც 1500-ზე მეტი ადამიანი ცხოვრობს საჭირო რაოდენობის ადამიანები ვერ შეკრიბო იმისთვის, რომ პრიორიტეტი გამოავლინო: „ვალეში არ არის გზა, წყალი, მოსაწესრიგებელია ინფრასტრუქტურა და აქ პრიორიტეტის გამოვლენა არ არის რთული. უხერხულია, რომ ამხელა დასახლებიდან გამგეობამ სრულყოფილი ანგარიში ვერ მიიღო სამინისტროში წარსადგენად. ამის გამო იქ პროექტი დროულად ვერ განხორციელდა, ეს ბევრ ადამიანს შეეხო და ამიტომ, ნასყიდაშვილის გათავსიუფლების შესახებ დაწერილი ბრძანება სამართლიანია“.
მოსამართლე გადაწყვეტილებას 29 ოქტომბერს 14:40 საათზე გამოაცხადებს.
„სასამართლოს ვერ ვატყობ, რომ არაობიექტურად ან მიკერძოებულად მიჰყავდეს პროცესი, მაგრამ, სამწუხაროდ, პრაქტიკიდან გამომდინარე, როცა სახელმწიფოს წინააღმდეგაა საქმე, ხშირ შემთხვევაში სასამართლოები იხრებიან ძალაუფლების მხარეს და მათ სასარგებლოდ წყვეტდენ საკითხს“, - აცხადებს ადვოკატი.
ნასყიდაშვილი ვალეს ტერიტორიული ორგანოს რწმუნებულად 2013 წლის 15 იანვარს დაინიშნა და აცხადებს, რომ იგი „ქართული ოცნების“ მხარდამჭერია.
[თამუნა უჩიძე, ახალციხე]