სომხუმა თემმა საძელში სურბ სარქისის დღესასწაული იზეიმა [ვიდეო]

დღეს, რვა თებერვალს, ხუთ დღიანი მარხვა დასრულდა, სომეხი ერი წმინდა სარქისის სახელობის დღესასწაულს ზეიმობს. ეს რელიგიური და სახალხო დღესასწაულია, რომელიც მოძრავია და თითქმის ყოველ წელს, თებერვალში აღინიშნება.

სადღესასწაულო წირვა ახალციხის სოფელ საძელში, 10:30 დაიწყო და ახალგაზრდების კურთხევით გაგრძელდა.

გასულ წლებში, ახალციხიდან სოფელ საძელამდე მრევლი მსვლელობას აწყობდა, რომლის დროსაც ხალხს სიმბოლურად ცხენზე ამხედრებული კაცი მიუძღვოდა წინ. მხედარი წმინდა სარქისს განასახიერებდა. წელს ტრადიცია ვრ განხორციელდა.

სომხური ეკლესია ამ დღეს წმინდა სარქისთან ერთად, მისი შვილის მარტიროსის თავის მოკვეთისა და თოთხმეტი მებრძოლის ხსენების დღესაც აღნიშნავს.

სურბ სარქისის დღესასწაულს სახალხო ტრადიციები უკავშირდება. ერთ–ერთი მათგანი ბედის კვერის გამოცხობაა, რომელსაც შემდეგ დასაქორწინებელი ახალგაზრდები ჭამენ. მათ სჯერათ, რომ სიზმარში საბედოს ნახავენ.

კვერების ცხობის ე.წ. რიტუალი ახალციხეშიც შესრულდა.



[რიმა სარუხანიან, ოთარ აწყურელი ახალციხე]